Xiaomi, Qualcomm və MediaTek-ə olan asılılığı azaltmaq məqsədilə öz çipsetlərini yaratmaq üçün yeni komanda formalaşdırır.
Xiaomi öz çip istehsalı təşəbbüsünə ciddi yanaşır — layihəyə rəhbərlik etməsi üçün şirkət keçmiş Qualcomm top-meneceri Çin Muyunu cəlb edib. O, birbaşa Xiaomi-nin baş direktoru Lei Juna tabe olacaq ki, bu da layihənin şirkət üçün nə qədər strateji əhəmiyyət daşıdığını göstərir.
Son illər Qualcomm və MediaTek çipsetlərinin qiymətləri artmağa başlayıb — səbəb isə yeni, daha bahalı texnoloji proseslərə keçiddir. Nəticədə Xiaomi hazır çiplərə görə daha çox məbləğ ödəməli olur. Bu vəziyyət şirkəti öz həll yollarını axtarmağa vadar edib.
Daha əvvəl məlumat verilmişdi ki, Xiaomi artıq öz 3 nanometrlik prosessoru üzərində əsas işləri tamamlayıb, lakin bu çipi 2025-ci ilin birinci yarısında təqdim etməyib. Şayiələrə görə, yaxın aylarda şirkət Snapdragon 8 Gen 1 səviyyəsində performansa malik, lakin ARM nüvələrinə əsaslanan və xüsusi (custom) nüvələrsiz daha sərfəli 4 nm çipi təqdim edə bilər.
Xiaomi-nin prosessor yaratmaq sahəsində sonuncu ciddi cəhdi 2017-ci ildə olmuşdu — o zaman şirkət 28 nm-lik Surge S1 çipini çıxarmışdı. İndi isə yanaşma daha iri miqyaslı və texnoloji baxımdan daha iddialı görünür. Bu da Xiaomi-nin gələcəkdə flaqman cihazlarında öz SoC-larını istifadə etmək niyyətindən xəbər verir.
