Meta-nın yeni ağıllı eynəkləri Apple-ın Vision Pro ilə yaratmaq istədiyi cihazın alternativi olacaq. UploadVR portalının daxili mənbələrinin bildirdiyinə görə, bu qurğu “110 qram çəkidə, bir qədər iri görünüşlü eynəklər” kimi təsvir olunur. Onun əsas funksiyası bir neçə virtual iş masasını eyni anda açmaq və onlarla işləmək imkanı yaratmaqdır. Qurğunun idarə olunması isə göz hərəkətləri və jestlərlə baş tutacaq.
Linzalara görüntü ötürmək üçün kifayət qədər güclü texnologiya tələb olunduğundan, bu avadanlığı eynəyin çərçivəsinə yerləşdirmək mümkün deyil. Bu səbəbdən cihaz nazik kabel vasitəsilə prosessor, batareya və digər hissələri olan kiçik bir qutuya qoşulacaq.
Hazırda «Puffin» kod adı ilə tanınan layihə ilkin araşdırma mərhələsindədir. Bu mərhələdə sənaye dizaynı, potensial satış qiyməti və prototipləmə planı formalaşdırılır. Şirkət daxilində bu eynəklərin buraxılışı 2026-cı ilə planlaşdırılıb — məhz bu dövrdə Quest virtual və qarışıq reallıq kaskalarının dördüncü nəslinin təqdimatı gözlənilirdi.
Bəs nəyə görə prioritetlər bu qədər sürətlə dəyişdi? Güman edilir ki, Quest 3 satış gözləntilərini doğrultmayıb. 2025-ci ilin birinci rübündə Reality Labs bölməsinin gəliri 2024-cü ilin eyni dövrü ilə müqayisədə cəmi 6 % azalıb. Amma bu rəqəmə baxmayaraq, Meta bir neçə həftə sonra yeni nəsil Quest cihazlarını 2027-ci ilə keçirdiyini açıqlayıb.
