Şəbəkədə Infinix Note 50s smartfonu ilə bağlı rəsmi məlumatlar yayılıb. Bu model Note 50 seriyasının ikinci nümayəndəsi olacaq. Təqdimatdan qısa müddət əvvəl istehsalçı cihazın əsas xüsusiyyətlərini təsdiqləyib — onlara prosessor, batareyanın tutumu və kameranın təsvir ölçüsü daxildir.
Rəsmi məlumata görə, Infinix Note 50s modelinin arxa kamerası 64 MP təsvir ölçülü Sony IMX682 sensoru ilə təchiz olunacaq və bu kamera 30 kadr/saniyə sürətlə 4K video yazmağı dəstəkləyəcək. Smartfonun əsasını Dimensity 7300 Ultimate prosessoru təşkil edəcək, enerji ilə təminatı isə 5500 mAh tutumlu batareya həyata keçirəcək.
Cihazın ön hissəsində 144 Hz yenilənmə tezliyinə malik AMOLED ekran yerləşəcək və bu ekran Gorilla Glass 5 qoruyucu şüşəsi ilə «örtüləcək». Korpusun suya və toza davamlılığı IP64 standartı ilə təmin olunacaq, fiziki zərbələrə qarşı dayanıqlılığı isə hərbi standart olan MIL-STD-810 sertifikatı ilə təsdiqlənib.
Infinix Note 50s mavi (eko dəridən hazırlanmış), boz və qırmızı rəng variantlarında satışa çıxarılacaq. Rəsmi təqdimat tarixi isə 18 aprel olaraq müəyyən edilib.
