Apple-ın süni intellekt texnologiyaları yarışında geri qalması artıq hamıya məlumdur: şirkətin Apple Intelligence adlı öz AI sistemini təqdim edəcəyinə dair vədlərinə baxmayaraq, bu layihənin iOS 18 yox, iOS 19 ilə birlikdə çıxması gözlənilir.
Amma vəziyyət dəyişməlidir. Apple-ın proqram təminatlarının inkişafına cavabdeh olan baş vitse-prezident Kreyg Federiqinin qərarı ilə mühəndislərə üçüncü tərəfə məxsus böyük dil modellərindən (LLM) istifadə etmək üçün tam səlahiyyət verilib. Artıq əsas prinsip qapalı ekosistem deyil, məqsədə nail olmaqdır – yəni bazarda ən güclü süni intellekt köməkçisini təqdim etmək. Bu barədə The Information öz yeni hesabatında məlumat verib.
Apple-ın özünün yaratdığı dil modelləri hələlik bazarın liderləri ilə müqayisədə ciddi şəkildə geri qalır. Amma bu, 2023-cü ildə şirkət rəhbərliyinin xarici texnologiyaların istifadəsinə məhdudiyyət qoymasına mane olmadı. Hətta bəzi mühəndislər OpenAI ilə təcrübələr aparsa da, bu işlər heç vaxt ciddi nəticəyə gətirib çıxarmadı.
İki ildən sonra isə məlum oldu ki, bu qərar səhv imiş. Süni intellekt layihəsinin ləngiməsi, elektrikli avtomobil layihəsinin ləğvi və Vision Pro-nun uğursuz çıxışından sonra bu hadisə Apple üçün 2024–2025-ci illərin növbəti böyük uğursuzluğuna çevrilib.
