Apple növbəti nəsil MacBook Pro modellərində ciddi dəyişikliklərə hazırlaşır. Yeni insayder məlumatlarına görə, şirkətin OLED ekranlı noutbukları indiki modellərdən yalnız ekran texnologiyasına görə deyil, dizayn və idarəetmə imkanlarına görə də fərqlənəcək. Ümumilikdə yeni MacBook Pro-larda altı əsas yenilik gözlənilir.
Bloomberg-in məlumatına görə, yeni «Pro» modelləri OLED ekran, sensor idarəetmə dəstəyi və iPhone-lardan tanıdığımız Dynamic Island kəsiyinə sahib olacaq. Bu, MacBook tarixində ekranla qarşılıqlı əlaqə baxımından ən böyük dəyişikliklərdən biri ola bilər.
Performans tərəfində isə hələ rəsmi təqdim edilməmiş M5 Pro və M5 Max çiplərinin istifadə olunacağı bildirilir. Apple bununla kifayətlənməyərək korpus üzərində də dəyişiklik edəcək: yeni noutbuklar daha nazik və nəzərəçarpacaq dərəcədə yüngül olacaq. Bununla belə, çəkinin nə qədər azalacağı hələ açıqlanmayıb.
Maraqlıdır ki, Apple artıq yeni MacBook Pro modellərini macOS 27.2-nin beta versiyası ilə sınaqdan keçirir. Bu isə cihazların hazırlanmasının kifayət qədər irəlilədiyini göstərir. Yeni OLED versiyaları MacBook Pro ailəsinin ən üst pilləsində yerləşəcək. Buna görə də onların qiyməti hazırkı modellərdən xeyli baha olacaq. İlkin məlumatlara əsasən, yeni noutbukların təqdimatı 2026-cı ilin noyabrından gec olmayaraq baş tutmalıdır.
