Valve nəhayət uzun müddətdir gözlənilən Steam Frame VR dəbilqəsinin qiymətini və satışa çıxarılma tarixini açıqlayıb. Naqilsiz işləyə bilən və kompütersiz oyunları işə salmağı bacaran cihaz üçün kifayət qədər yüksək məbləğ ödəmək lazım olacaq.
Steam Frame 18 sentyabrda satışa çıxacaq. 256 GB yaddaşa malik versiya 1 059 dollar, 1 TB yaddaşlı model isə 1 299 dollar qiymətində olacaq. Digər ölkələrdə qiymətin necə dəyişəcəyi hələ məlum deyil.
Steam Frame dəbilqə və kontrollerlərdən ibarət tam simsiz VR sistemidir. Onun əsas üstünlüyü kompüterə qoşulmadan müstəqil işləyə bilməsidir. Cihaz Steam kitabxanasındakı oyunları birbaşa işə salır. Bunun üçün sistemdə Snapdragon 8 prosessoru və 16 GB RAM quraşdırılıb.
Valve dəbilqənin rahatlığına da xüsusi diqqət yetirib. Ön və arxa hissənin çəkisi elə bölüşdürülüb ki, cihaz başda daha yüngül hiss olunsun və kompakt quruluşunu qorusun.
Ekran hissəsində 2160 × 2160 piksel təsvir ölçüsünə malik iki LCD panel istifadə olunur. Yenilənmə tezliyi 72–144 Hz arasında dəyişir. Hər iki tərəfdə isə daxili stereo dinamiklər yerləşdirilib. Naqilsiz bağlantı üçün cihaz 6 GHz tezliyində işləyən və iki radio qəbulediciyə malik adapter ilə təchiz olunur.
Dəbilqənin ilkin quraşdırılması da uzun çəkməməlidir. Valve bunun üçün hərəkətlərin izlənməsinə cavabdeh olan dörd daxili monoxrom kamera quraşdırıb.
Steam Frame kontrollerlərinin düymə düzülüşü artıq tanış olan Steam Controller quruluşuna bənzəyir. Bundan əlavə, qadcetlər yeni nəsil maqnit analoq çubuqları ilə təchiz olunub və cəmi bir AA batareya ilə təxminən 40 saat işləyə bilir.
Steam Frame-in satışının əvvəlcə yayın sonuna qədər başlaması planlaşdırılırdı. Valve bu qrafikə bir qədər gecikmə ilə çatıb. Üstəlik, ilk mərhələdə cihazların sayı məhdud ola bilər: şirkətin çoxsaylı müraciətlər arasından alıcıları özü seçəcəyi bildirilir.
