Sony-nin növbəti nəsil konsolu PlayStation 6 ilə bağlı planları hələ də qeyri-müəyyən olaraq qalır. Şirkət konsolun nə vaxt satışa çıxacağını belə təxmini şəkildə açıqlaya bilmir. Əsas problem isə komponentlərin bahalaşması və çatışmazlığıdır.
Sony-nin baş direktoru Hiroki Totoki The Wall Street Journal-a müsahibəsində bildirib ki, şirkət PlayStation 6-nın təqdimat tarixini hələ müəyyənləşdirməyib. Onun sözlərinə görə, davam edən komponent çatışmazlığı və qlobal ticarət münaqişələri yeni konsolun buraxılış planlarına ciddi təsir göstərir.
Əvvəllər analitiklər PS6-nın 2027-ci ildə təqdim ediləcəyini gözləyirdilər. Lakin hazırkı vəziyyət fonunda bu proqnoz getdikcə daha az real görünür.
Şirkətin qarşısındakı əsas problemlərdən biri yaddaş komponentləridir. Süni intellekt infrastrukturu üçün yaddaşa olan tələbatın kəskin artması qiymətləri yüksəldib və təchizat çatışmazlığının 2027-ci maliyyə ilində də davam edə biləcəyi gözlənilir.
Totoki bildirib ki, Sony yeni nəsil konsolu planlaşdırarkən bu vəziyyəti mütləq nəzərə almalıdır. Başqa sözlə, şirkət hazırkı komponent qiymətlərinin gələcəkdə necə dəyişəcəyini bilmədən PS6 üçün həm istehsal həcmini, həm də qiymət strategiyasını dəqiq müəyyənləşdirə bilmir. Bu məsələ əslində yeni deyil. Totoki hələ may ayında Sony-nin PlayStation 6-nın nə vaxt çıxacağını və qiymətinin nə qədər olacağını müəyyənləşdirmədiyini açıqlamışdı.
Qeyri-müəyyənlik fonunda artıq konsolun 2028-ci ildə satışa çıxacağı ilə bağlı proqnozlar da səslənir. Bu ehtimallardan biri Sony-nin 2028-ci ilin yanvarında fiziki disklərin istehsalını dayandırmaq planları ilə əlaqələndirilir.
Lakin bunlar hələlik yalnız ehtimallardır. Sony PS6-nın buraxılış tarixini, qiymətini və texniki xüsusiyyətlərini rəsmi şəkildə açıqlamayıb.
