Google Gemini 3.7 Flash adlı yeni süni intellekt modelini təqdim edib. Yeni versiya əvvəlki Gemini 3.6 Flash-dan bir aydan da az müddət sonra çıxıb və şirkət bildirir ki, yenilik əsasən tərtibatçıların rəyləri və yeni alqoritmik həllər nəzərə alınaraq hazırlanıb.
Gemini 3.7 Flash xüsusilə proqramlaşdırma, veb inkişafı və mürəkkəb çoxmərhələli tapşırıqların yerinə yetirilməsi üçün təkmilləşdirilib. Ən nəzərəçarpan dəyişikliklərdən biri kodla işləməkdədir: model artıq proqramdakı səhvləri daha yaxşı tapır və düzəldir. Məsələn, DeepSWE v1.1 testində Gemini 3.7 Flash 65,3% nəticə göstərib. Əvvəlki versiyanın göstəricisi 49% idi. FrontierCode 1.1 Main testində isə nəticə 34,4%-dən 43,6%-ə yüksəlib.
Google-un yeni modeli veb inkişafında da daha funksional interfeys və tətbiqlər yaratmağa başlayıb. Üstəlik, Gemini 3.7 Flash dizayn hazırlayarkən təqdim olunan şəkil, ekran görüntüsü və ya dizayn sisteminə daha dəqiq uyğunlaşır.
WebDev Arena testində yeni model 1588 Elo balı toplayıb. Gemini 3.6 Flash isə 1538 bal əldə etmişdi.
Model həmçinin ilkin dizaynın əsas xüsusiyyətlərini daha yaxşı qoruyur. Nümunə kimi sadə ekran görüntüsündən, adi şəkildən və ya tam dizayn sistemindən istifadə edilməsindən asılı olmayaraq nəticə daha çox orijinala bənzəyir.
Gemini 3.7 Flash maliyyə, hüquq və biologiya kimi ixtisaslaşmış sahələrdə böyük həcmli məlumatların emalında da daha yüksək nəticələr göstərib. Mürəkkəb sənədlərlə işləmə qabiliyyətini yoxlayan GDP.pdf testində model 34% nəticə əldə edib. Gemini 3.6 Flash isə burada cəmi 22% toplamışdı. Real iş proseslərini yerinə yetirmək qabiliyyətini ölçən AutomationBench testində də göstərici 17%-dən 30,4%-əyüksəlib.
Google-un daha bir maraqlı qərarı qiymətlə bağlıdır. Şirkət 2026-cı ilin sonuna qədər Gemini 3.7 Flash üçün 3.6 Flash-ın ilkin qiymətindən iki dəfə aşağı tariflər müəyyənləşdirib.
Yeni modelin qiyməti:
- 1 milyon giriş tokeni — 0,75 dollar
- 1 milyon çıxış tokeni — 3,75 dollar
Gemini 3.7 Flash artıq Spark adlı şəxsi AI agentində də istifadə olunur. Xidmət Google AI Pro və Ultra abunəçiləri üçün 160-dan çox ölkədə əlçatandır.
Tərtibatçılar isə yeni modeldən Gemini API, Google AI Studio, Android Studio və Gemini Enterprise Agent Platform vasitəsilə istifadə edə bilərlər.
