Samsung bu yay “Ultra” adını daşıyan yeni qatlanan smartfonunu təqdim edəcəyini rəsmi şəkildə təsdiqləyib. Rəsmən cihazın tam adı açıqlanmasa da, mütəxəssislər bunun Galaxy Z Fold Ultra və ya Z Fold 7 Ultra ola biləcəyini düşünürlər.
Ənənəvi olaraq Samsung iki növ qatlanan smartfon təqdim edir: kitab formasında açılan Z Fold və şaquli istiqamətdə qatlanan Z Flip modelləri. Lakin görünür ki, 2025-ci ildə şirkət bu seriyaya premium “Ultra” modeli də əlavə etməyə hazırlaşır.
Yayımlanan tizerə əsasən, yeni cihaz çox nazik və yüngül olacaq – hətta Galaxy Z Fold6-dan da nazik ola biləcəyi ehtimal edilir. Rəsmi press-relizdə vurğulanır ki, bu model “istifadəsi rahat və funksiyalardan yüklənməmiş” olacaq.
Cihazın bu qədər nazik olmasına baxmayaraq, Samsung-un güclü kamera və tutumlu batareyanı qoruyub saxlayıb-saxlamayacağı hələ məlum deyil. Daha əvvəl, ultra-nazik Galaxy S25 Edge modeli ilə bağlı batareya və kameranın keyfiyyətindən narazılıqlar olmuşdu. Eyni kompromis Ultra Fold modelində də olacaqmı – bunu yay aylarında öyrənəcəyik.
Yeni smartfonun iyul 2025-də təqdim olunması gözlənilir.
