WWDC25 inkişaf etdiricilər konfransı ərəfəsində Apple şirkəti hər il keçirilən Apple Design Awards 2025 mükafatının qaliblərini və finalçılarını elan edib. Bu il jüri 12 tətbiq və oyunu — dizayn, texniki həllər və yaradıcılıq baxımından fərqlənən layihələri — xüsusi olaraq seçib. Qaliblər dünyanın müxtəlif ölkələrindən seçilmiş 36 finalçı arasından müəyyən olunub.
Mükafatlar 6 kateqoriya üzrə təqdim olunub: sevinc və əyləncə; innovasiya; interaktivlik; əlçatanlıq (inklüzivlik); sosial təsir; qrafika və vizual dizayn.
Hər bir kateqoriyada biri tətbiq, digəri oyun olmaqla iki qalib seçilib.
Sevinc və əyləncə
-
CapWords – 9 dildə söz öyrətmək üçün fotoları interaktiv stikerlərə çevirən öyrədici tətbiq.
-
Balatro – Poker, pasyans və roguelike janrlarını birləşdirən qeyri-adi kart oyunu.
İnnovasiya
-
Play – iPhone və Mac arasında sinxron SwiftUI interfeys prototipləri yaratmaq üçün güclü alət.
-
PBJ: The Musical – “Romeo və Cülyetta”nın sendviç qəhrəmanlarla təqdim olunan musiqili komediya versiyası.
İnteraktivlik
-
Taobao (Vision Pro versiyası) – məhsulları 3D formatda təqdim edən və Vision Pro ilə alış-verişi mümkün edən tətbiq.
-
DREDGE – qorxu elementləri olan atmosferik balıqçılıq macərası.
Əlçatanlıq (inklüzivlik)
-
Speechify – 50-dən çox dildə mətnləri səsə çevirən, disleksiya, diqqət pozuntusu və görmə çətinliyi olanlara kömək edən tətbiq.
-
Art of Fauna – vəhşi təbiət haqqında vizual tapmaca oyunu, VoiceOver dəstəyi və fərqli qavrama tiplərinə uyğunlaşdırılmış oyun mexanikası ilə.
Sosial təsir
-
Watch Duty – meşə yanğınları haqqında real vaxtda xəbərdarlıq edən tətbiq.
-
Neva – qız və canavarın dağılan dünyada yaşadığı emosional macəra.
Qrafika və vizual dizayn
-
Feather – iPad üçün 3D rəsm tətbiqi, istifadəçilərə istənilən səviyyədə həcimli layihələr yaratmağa imkan verir.
-
Infinity Nikki – açıq dünya, sehrli geyimlər və gözoxşayan vizual effektlərlə zəngin rəngarəng oyun.
Qaliblər WWDC25 çərçivəsində təqdim olunacaq və onların layihələri Apple platformalarının imkanlarını genişləndirən nümunələr kimi tanıdılacaq.
