İtaliyanın məşhur avtomobil istehsalçısı Lamborghini rəsmi olaraq Temerario adlı yeni hibrid superkarını təqdim edib. Təxminən 1000 at gücünə malik bu güclü model, bir zamanlar əfsanə sayılan Huracan-ın yerini tutacaq. Temerario-nun 2025-ci ildə yollarda görünməsi gözlənilir.
Avtomobil 920 at gücündə olan 4.0 litrlik iki turbokompressorlu V8 mühərrik və ümumilikdə 800 Nm fırlanma anı yaradan üç elektrik mühərriki ilə təchiz olunub. Temerario 0-dan 100 km/saat sürətə cəmi 2.7 saniyəyə çatır, maksimal sürəti isə 343 km/saat təşkil edir.
Model, 3.8 kVt/saat tutumlu litium-ion batareyaya malik hibrid transmissiya ilə təchiz olunub. Avtomobilin aerodinamikası Formula 1 yarışlarına uyğun şəkildə hazırlanıb: burulğan generatorları, altıbucaqlı hava girişləri və tənzimlənə bilən arxa spoyler Huracan Evo ilə müqayisədə 158% daha çox aerodinamik təzyiq təmin edir.
Temerario-nun salonu da texnoloji baxımdan zəngindir – burada biri 12.3 düymlük rəqəmsal panel, digəri isə 8 düymlük sensorlu ekran olmaqla ümumilikdə üç rəqəmsal displey mövcuddur. Xüsusi vurğulanmalı məqam isə avtomobilin idarəetmə sistemi ilə bağlıdır – sürücü beş fərqli sürüş rejimi arasında seçim edə bilər. Bunlara tam elektriklə çalışan “Citta” və sürüş zamanı maksimum idarəetmə imkanı verən “Corsa Plus” yarış rejimi də daxildir.
Temerario-nun təxmini başlanğıc qiyməti 400 min ABŞ dolları olacaq. İlk avtomobillərin 2025-ci ildə təqdim olunması planlaşdırılır.
