Xiaomi, OLED məhsullarının tədqiqi, inkişafı, istehsalı, satışı və servisi üzrə ixtisaslaşmış Çin şirkəti Lumilan ilə əməkdaşlıq etdiyini elan etdi. Tanınmış insayder Digital Chat Station-un məlumatına görə, texnologiya nəhəngi OLED əsaslı displeylərdə istifadə olunan materialları təkmilləşdirmək niyyətindədir.
Əməkdaşlıq çərçivəsində Xiaomi, Çinin sənaye mərkəzlərindən biri olan Ninqboda əsas OLED materialları və cihazları üçün laboratoriyanın açılışını elan etdi. Şirkət OLED displeylərdə mövcud texnoloji çatışmazlıqları aradan qaldırmaq üçün Lumilan ilə sıx əməkdaşlıq edəcəyini bildirib.
«Xiaomi-nin yeni onillikdə məqsədi əsas texnologiyalara böyük sərmayə qoymaq və bu texnologiyaların yeni nəslində qlobal lider olmağa çalışmaqdır», — dedi Xiaomi mobil telefon ekranı və sensor ekran biznesinin baş meneceri Wu Cangzhi.
Beləliklə, Xiaomi hələ ki, OLED ekranlarının birbaşa istehsalı ilə məşğul olmaq niyyətində deyil, lakin texnologiyanın özünü təkmilləşdirməyə çalışır.
