Redmi keçən həftə Çində yeni Note 13 smartfon seriyasını təqdim etdi. Buraya əsas model Note 13, qabaqcıl versiya Note 13 Pro və ən yüksək səviyyəli Note 13 Pro+ daxildir.
Keçən il olduğu kimi, bu smartfonların dünya bazarında satışa çıxarılacağı gözlənilir. Etibarlı mənbənin məlumatına görə, Xiaomi şirkəti Note 13 Pro modelini Poco brendi ilə qlobal bazara çıxarmağı planlaşdırır. Əksər Poco smartfonları əslində Redmi smartfonlarının rebrendinq edilmiş versiyalarıdır.
Hazırda Redmi Note 13 Pro-nun Poco seriyasında hansı adla satışa çıxarılacağı bəlli deyil, lakin keçmiş tendensiyalar əsasında onun Poco X seriyasının bir hissəsi olacağı ehtimal edilir.
Xatırladaq ki, Redmi Note 13 Pro yeni Snapdragon 7s Gen 2 prosessoru, 6,67 düymlük AMOLED displey, 200 meqapiksellik əsas kamera və 5100 milliamper/saat tutumlu akkumulyatorla təchiz edilib.
