Huawei flaqman Smart Screen Mate TV 2 televizor seriyasını təqdim edib. Yeni modellər şirkətin HarmonyOS 7 əməliyyat sistemi və Kirin 9 ailəsinə aid çiplərlə təchiz olunan ilk televizorlarıdır. Seriyaya üç model daxildir: Mate TV 2, daha güclü Mate TV 2 Pro və daha münasib qiymətli Yuexiang versiyası.
Bütün yeni televizorlar Super Mini LED ekran və Kirin T92 prosessoru ilə təchiz olunub. Şirkətin məlumatına görə, yeni çip əvvəlki nəsillə müqayisədə ciddi performans artımı təmin edir: birnüvəli CPU performansı 490%, çoxnüvəli göstərici 360%, GPU performansı isə 251% yüksəlib.
Televizorların süni intellekt imkanları 1080p məzmunu 4K keyfiyyətinə qədər yüksəltməyə, tətbiqləri simsiz şəkildə böyük ekrana ötürməyə və Huawei-nin xüsusi qələmi ilə televizoru idarə etməyə imkan verir. Bundan əlavə, yeni modellər şirkətin ağıllı ev ekosistemi ilə inteqrasiya olunur.
Smart Screen Mate TV 2 Yuexiang modeli 8 GB operativ və 128 GB daxili yaddaşa malikdir. Ekranın maksimal parlaqlığı 4000 nit təşkil edir. 130 vatt gücündə 2.2 formatlı audio sistem 40 kHz-ə qədər yüksək tezlikləri və 22 Hz-dən başlayan aşağı tezlikləri dəstəkləyir.
Standart Smart Screen Mate TV 2 də 8 GB operativ və 128 GB daxili yaddaşla təchiz olunub. Lakin bu modeldə ekranın maksimal parlaqlığı 5000 nitə çatır. Televizor həmçinin görüntünün emalı üçün ayrıca Honghu Vivid çipi, əksolmanı azaldan örtük və adi 2D videonu həcmli 3D görüntüyə çevirən xüsusi alqoritm əldə edib.
Bu modelin səs sistemi də daha güclüdür: 3.2.2 konfiqurasiyasında ümumi güc 180 vatt təşkil edir.
Seriyanın ən üst modeli olan Smart Screen Mate TV 2 Pro əsas texnologiyaları standart versiya ilə bölüşür, lakin daha böyük yaddaş həcmi ilə seçilir. Burada 12 GB operativ yaddaş və 256 GB daxili yaddaş təqdim olunur. Audio sisteminin ümumi gücü isə 240 vatta çatdırılıb.
Huawei Smart Screen Mate TV 2 seriyasının bütün modelləri artıq Çində ilkin sifariş üçün əlçatandır. Yuexiang versiyasının 65–85 düymlük modelləri 1 135–1 985 dollar, standart Mate TV 2 modelləri 65–98 düym ekran ölçüləri ilə 1 914–3 830 dollar, flaqman Mate TV 2 Pro isə 2 410–4 965 dollar qiymət aralığında təklif olunur.
