Google Chrome-un Android versiyası yeni interfeysə keçməyə hazırlaşır. Şirkət brauzerin aşağı hissəsinə əlavə panel yerləşdirən dizaynı məhdud sayda istifadəçi üzərində sınaqdan keçirir. Lakin yenilik ekranın aşağı hissəsində onsuz da kifayət qədər çox elementin olduğu istifadəçilər üçün heç də rahat görünmür.
Köhnə interfeys (solda), axtarış sətri aşağıda yerləşən yeni interfeys (ortada) və axtarış sətri yuxarıda yerləşən variant (sağda):
Yeni paneldə brauzerin ən çox istifadə olunan funksiyalarına sürətli keçid düymələri yerləşdiriləcək. Burada ana səhifə, Gemini, yeni tab və açıq tabların siyahısı üçün düymələr olacaq. Bundan başqa, Google ünvan sətrinin yanında ayrıca “Geri” düyməsi də əlavə edir. Əvvəllər alətlər panelinə daxil olan düymə isə interfeysin başqa hissəsinə köçürüləcək.
Əsas problem isə ünvan sətrindən aşağıda istifadə edənlərdə ortaya çıxır. Bu halda yeni panel ünvan sətrinin altında ikinci idarəetmə sətrinə çevrilir. Tab qruplarından istifadə edildikdə isə ekranın aşağı hissəsində artıq üç ayrı interfeys sətri yarana bilər.
Nəticədə ekranın əhəmiyyətli hissəsi brauzerin idarəetmə elementlərinə ayrılır və veb-səhifəni göstərmək üçün daha az yer qalır. Xüsusilə kiçik ekranlı smartfonlarda bu dəyişiklik kifayət qədər nəzərəçarpan ola bilər.
Tab qrupları ilə yeni interfeys:
Google əslində oxşar dizaynı ilk dəfə sınaqdan keçirmir. Şirkət bir neçə il əvvəl də Chrome-un Android versiyasında bənzər interfeys üzərində işləyirdi. Lakin istifadəçilərin mənfi reaksiyasından sonra Google 2020-ci ildə bu yanaşmadan imtina etmişdi.
İndi şirkət həmin ideyanı yenidən gündəmə gətirib. Hələlik yeni interfeys yalnız məhdud sayda Chrome istifadəçisinə təqdim olunur və onun bütün istifadəçilər üçün aktivləşdirilib-aktivləşdirilməyəcəyi məlum deyil.
