Apple-ın iPhone 18 seriyasını təqdim edəcəyi payız tədbirinin tarixi artıq rəsmən məlumdur. Təqdimat 9 sentyabrda keçiriləcək. İndi isə yeni iPhone-lar üçün ön sifarişlərin nə vaxt başlayacağı ilə bağlı məlumat ortaya çıxıb.
MacWorld-un etibarlı mənbəyə istinadən yazdığına görə, Apple bu il ön sifarişləri ənənəvi olaraq təqdimatdan sonrakı cümə günü deyil, 12 sentyabr şənbə günü açmağı planlaşdırır.
Bunun səbəbi isə təqvimlə bağlıdır. Təqdimatdan sonrakı gün — 11 sentyabr — ABŞ-da 2001-ci il terror aktlarının qurbanlarının anım günüdür. Apple oxşar vəziyyətlə daha əvvəl, 2015-ci ildə də qarşılaşıb. Həmin vaxt iPhone 6s və iPhone 6s Plus modelləri təqdim edildikdən sonra ön sifarişlər də cümə günü əvəzinə şənbə günü başlamışdı.
Sentyabrın 9-da keçiriləcək tədbirdə Apple-ın bir neçə mühüm yeniliyi təqdim edəcəyi gözlənilir. Bunların arasında iPhone 18 seriyası, Apple Watch Series 12, Watch Ultra 4 və şirkətin tarixində ilk qatlanan iPhone — iPhone Ultra yer alır.
Lakin qatlanan model digər cihazlardan bir qədər gec satışa çıxa bilər. Bəzi məlumatlara görə, iPhone Ultra üçün sifarişlərin yalnız sentyabrın ikinci yarısında qəbuluna başlanacaq.
