iQOO Çində yeni Neo 12 smartfonunu təqdim edib. Güclü prosessoru, oyunlar üçün nəzərdə tutulan əlavə qrafik çipi və daxili ventilyatorla təchiz edilmiş soyutma sistemi ilə seçilən model xüsusilə mobil oyun həvəskarlarına hesablanıb. Cihaz həmçinin 185 Hz ekran və 9000 mAh tutumlu batareya əldə edib.
185 Hz ekran və güclü oyun platforması
iQOO Neo 12, Visionox istehsalı olan 6,83 düymlük LTPS AMOLED ekranla təchiz edilib. Ekranın təsvir ölçüsü 3200 × 1440 piksel, piksel sıxlığı 514 ppi, maksimal parlaqlığı isə 2200 nitdir. Yenilənmə tezliyi 185 Hz-ə çatır.
Oyunlarda daha sürətli idarəetmə üçün sensor qatının sorğu tezliyi 5000 Hz, eyni vaxtda toxunuşların qeydə alınma tezliyi isə 500 Hz təşkil edir. Bu göstəricilərin maksimum səviyyəsi yalnız uyğun oyunlarda aktiv olur.
Smartfonun əsasını 3 nanometrlik texnologiya ilə istehsal edilmiş Snapdragon 8 Elite Gen 5 prosessoru və Adreno 840 qrafik sürətləndiricisi təşkil edir. Bundan əlavə, xüsusi Q3 oyun çipi də quraşdırılıb. O, dəstəklənən oyunlarda təsvirin miqyaslandırılması, əlavə kadrların yaradılması və şüa izləmə kimi qrafik imkanlarını aparat səviyyəsində emal edir.
Daxili ventilyatorla aktiv soyutma
Neo 12-nin diqqətçəkən xüsusiyyətlərindən biri Ice Dome adlı aktiv soyutma sistemidir. Sistemə 17 × 17 mm ölçülü ventilyator, xüsusi hava kanalı və 8200 mm² sahəli buxar kamerası daxildir.
Ventilyator üç rejimdə işləyə bilir: səssiz, ağıllı və maksimum sürət. Beləliklə, istifadəçi soyutmanın iş rejimini seçə bilər.
Operativ yaddaş LPDDR5X Ultra standartındadır və 12 və ya 16 GB həcmində təklif olunur. UFS 4.1 daxili yaddaşının tutumu isə 256 GB, 512 GB və ya 1 TB ola bilər.
50 MP kamera və 8K video çəkilişi
Smartfonun arxa kamera sistemi iki moduldan ibarətdir. Əsas kamera 50 MP Sony IMX921 sensorundan istifadə edir və optik görüntü sabitləşdirməsini dəstəkləyir. Ona f/2.2 diafraqmalı 8 MP genişbucaqlı kamera qoşulub.
Əsas kamera 20 qat rəqəmsal yaxınlaşdırma və 8K video çəkilişi imkanlarına malikdir. Ön tərəfdə, ekranın yuxarı mərkəzində yerləşən dəlikdə isə 16 MP kamera var.
9000 mAh batareya və 100 Vt şarj doldurma
iQOO Neo 12-nin batareyasının tutumu 9000 mAh-dır. Smartfon 100 Vt gücündə naqilli şarj doldurmanı dəstəkləyir. Həmçinin enerji təchizatını batareyadan yan keçirməklə birbaşa cihaza yönəldən texnologiya mövcuddur.
İstehsalçının bildirdiyinə görə, telefon qısa videoları fasiləsiz oynadarkən 29,9 saata qədər işləyə bilər.
Digər xüsusiyyətlər və qiymətlər
Cihaz 5G, Wi-Fi 7, Bluetooth 5.4, GPS, NFC və infraqırmızı pult funksiyasını dəstəkləyir. İki nanoSIM yuvası, USB 2.0 Type-C portu və simmetrik stereo dinamiklər də nəzərdə tutulub. Korpus IP68/IP69 standartlarına uyğun qorunur, barmaq izi skaneri isə ekranın altında yerləşir.
Smartfon Android 17 əməliyyat sistemi və OriginOS 7 interfeysi ilə işləyir. Model gümüşü, mavi və qara rənglərdə təqdim olunur.
Çində iQOO Neo 12-nin qiymətləri belədir:
- 12 GB RAM + 256 GB yaddaş: 660 dollar
- 16 GB RAM + 256 GB yaddaş: 720 dollar
- 12 GB RAM + 512 GB yaddaş: 765 dollar
- 16 GB RAM + 512 GB yaddaş: 825 dollar
- 16 GB RAM + 1 TB yaddaş: 975 dollar
Smartfonun Çin xaricində satışa çıxarılması ilə bağlı hələlik məlumat yoxdur.
