Google itmiş əşyaların yerini tapmaq üçün ilk Pixel Tag izləyicisini təqdim edib. Kiçik qurğunu açarlara, pul kisəsinə və ya baqaja taxmaq mümkündür. Onun yerini tapmaq üçün isə Android cihazlarında işləyən Find Hub xidmətindən istifadə edilir.
Pixel Tag smartfona yaxın məsafədədirsə, istifadəçi onu səs siqnalı verməyə məcbur edə bilər. UWB texnologiyasını dəstəkləyən uyğun Android smartfonlarında isə daha dəqiq axtarış funksiyası mövcuddur: ekranda trekerə qədər olan məsafə və hansı istiqamətdə hərəkət etmək lazım olduğu göstərilir.
Pixel Tag Bluetooth bağlantısının əhatə dairəsindən kənara çıxdıqda onun yerini müəyyənləşdirmək üçün Find Hub şəbəkəsi işə düşür. Bu şəbəkə dünyanın müxtəlif yerlərindəki 1 milyarddan çox Android cihazını birləşdirir.
Başqa sözlə, Pixel Tag-ın sahibi ondan uzaqda olsa belə, yaxınlıqdakı Android smartfonları trekerin yerini müəyyənləşdirməyə kömək edə bilər. Google bildirir ki, məkan məlumatları başdan-başa şifrələmə ilə qorunur.
Şirkət izlənmə riskinə qarşı da tədbir görüb. İstifadəçinin yanında ona məxsus olmayan naməlum treker hərəkət edərsə, Android smartfonu bu barədə xəbərdarlıq göstərəcək. İstifadəçi istəsə, həmin trekerdə səs siqnalını aktivləşdirərək onun harada olduğunu müəyyənləşdirə bilər.
Left Behind funksiyası isə əşyanın arxada qaldığını bildirir. Məsələn, Pixel Tag taxılmış çantanı və ya açarları hansısa yerdə unutduqda istifadəçi dərhal xəbərdar ola bilər.
Pixel Tag-ın korpusu paslanmayan poladdan hazırlanıb və IP67 standartına uyğun olaraq su və tozdan qorunur. Daxilindəki dəyişdirilə bilən batareya bir ilə qədər işləyə bilir. Enerji tükəndikdə onu istifadəçi özü yenisi ilə əvəz edə bilər. Trekerin üzərindəki düyməyə basdıqda isə ona qoşulmuş smartfon səs siqnalı verməyə başlayır. Bu funksiya telefonu evdə və ya başqa yerdə tapmaq üçün də istifadə oluna bilər.
Pixel Tag-ı qoşmaq üçün Android 9 və ya daha yeni versiyaya, həmçinin Bluetooth 6.0 və ya daha yeni standartı dəstəkləyən cihaz lazımdır. İlkin qoşulma isə olduqca sadədir: trekeri smartfona yaxınlaşdırmaq kifayətdir və Fast Pairavtomatik cütləşdirməni həyata keçirir.
Find Hub daxilində əşyanın kateqoriyasını seçmək və ya ona öz adınızı vermək mümkündür. Üstəlik, bir Pixel Tag-a giriş hüququnu daha 10 nəfərlə paylaşmaq olar.
Pixel Tag-ın yerini tapmaq üçün mütləq smartfondan istifadə etmək lazım deyil. Treker Pixel Watch üzərindəki Find Hub-da və brauzer versiyasında da görünür. Pixel Buds istifadəçiləri isə hətta Gemini-dən trekerdə səs siqnalını aktivləşdirməsini xahiş edə biləcəklər.
Google Pixel Tag ABŞ-da 11 noyabrda satışa çıxacaq. Bir trekerin qiyməti 29 dollar, dörd ədədlik dəst isə 99 dollar olacaq.
