Məşhur yapon istehsalçısı Panasonic, televizor bazarından çıxmağı və əlaqəli biznesi satmağı nəzərdən keçirir. Bu barədə şirkətin prezidenti Yuki Kusumi brendin gəlirlərinə həsr olunmuş bu yaxınlarda keçirilən konfrans zamanı bildirib.
Yuki Kusumi qeyd edib ki, Panasonic televiziya biznesini “lazım gələrsə” satmağa hazırdır, baxmayaraq ki, şirkətin bununla bağlı hələ dəqiq planı yoxdur. Bunun səbəbi yüksək rəqabətdir — 2016-cı ildə brend, ucuz LCD televizorların populyarlığının artması və «plazma» televizorlara olan tələbin azalması nəticəsində ABŞ istehlakçı bazarını tərk etməli olmuşdu. Sonradan şirkət ölkəyə geri qayıtsa da, rəqiblərini yenidən ötmək mümkün olmamışdır.
Panasonic-in OLED televizorları yüksək rəng dəqiqliyi və müasir texnologiyaların dəstəyi ilə bazarda ən yaxşılarından hesab olunur, lakin bu sahədə artıq digər istehsalçılar da uğur qazanıb: məsələn, LG, Sony və Samsung.
