GTA VI satışa çıxmamış oyun sənayesinin rekordlarını yeniləməyə davam edir. Analitiklərin məlumatına görə, Rockstar Games-in yeni oyunu artıq Sony və Microsoft konsolları tarixində ən çox öncədən sifariş edilən layihəyə çevrilib.
Maraqlıdır ki, Sony və Microsoft nümayəndələri bu barədə eyni gündə, cəmi beş dəqiqə fərqlə açıqlama yayıblar. PlayStation bunu rəsmi hesabında paylaşdığı halda, Microsoft adından Xbox rəhbəri Aşa Şarma məlumat verib. Bundan əvvəl Take-Two şirkətinin rəhbəri Ştraus Zelnik də öncədən sifarişlərin sayının gözləniləndən xeyli yüksək olduğunu bildirmişdi. Şirkət böyük maraq gözləsə də, tələbatın bu səviyyəyə çatacağını proqnozlaşdırmamışdı.
Sensor Tower analitiklərinin hesablamalarına əsasən, GTA VI indiyədək təxminən 1 milyard dollar gəlir əldə edib. Bu məbləğin hamısı oyunu əvvəlcədən sifariş edən istifadəçilərin ödənişlərindən formalaşıb. Ümumilikdə təxminən 10 milyon nüsxə öncədən alınıb. Platformalar üzrə bölgüdə isə PlayStation açıq üstünlüyə malikdir: sifarişlərin 75%-i Sony konsollarının, 25%-i isə Xbox-ın payına düşür.
Oyunun rəsmi təqdimat tarixi 19 noyabr olaraq göstərilib. GTA VI əvvəlcə PlayStation 5 və Xbox Series konsollarında satışa çıxacaq. PC versiyası isə daha sonra yayımlanacaq. Şayiələrə görə, PC versiyasını uzun müddət gözləmək lazım gəlməyə bilər: oyunun bu platformaya portunun gələn ilin əvvəlində çıxacağı iddia olunur. Lakin bu məlumat hələ rəsmi təsdiqlənməyib.
