Samsung ilk dəfə qulaqda klips vasitəsilə sabitlənən Galaxy Buds On adlı TWS qulaqcıqlarını təqdim edib. Yeni model ənənəvi qulaqcıqlardan fərqli olaraq qulaq kanalını tam bağlamır. Bu sayədə istifadəçi musiqi və zənglərdən əlavə ətrafdakı səsləri də eşidə bilir.
Samsung Galaxy Buds On hazırlanarkən müxtəlif qulaq formaları nəzərə alınıb. Şirkət dinamiklərin, batareyanın və klips mexanizminin yerləşdirilməsini rahatlıq və sabitlik arasında balans yaratmaq üçün optimallaşdırıb. Qulaqla təmas sahəsinin geniş olması təzyiqi azaldır, eyni zamanda qulaqcıqlar hərəkət zamanı yerindən tərpənmir. Musiqini və zəngləri korpusun arxa hissəsinə toxunmaqla idarə etmək mümkündür.
Qulaqlıqların akustik sistemində dərin bas səslər üçün TwinBoost dinamikləri və Qualcomm Snapdragon S7 Gen 1 Sound Platform çipi istifadə olunur. Sistem D sinifli gücləndirici ilə tamamlanır. Galaxy Buds On ətrafdakı səs-küyə uyğun olaraq səs səviyyəsini avtomatik dəyişə bilir. Audio Leakage Reduction funksiyası isə səsin qulaqcıqlardan kənara yayılmasını azaltmağa kömək edir. Batareyanın bir dəfə şarj doldurulması ilə 9,5 saata qədər musiqi dinləmək mümkündür.
Zənglər üçün qulaqlıqlar üç mikrofon və sümük keçiriciliyindən istifadə edən Voice Pickup Unit sensoru ilə təchiz olunub. Intelligent Clear Call sistemi mikrofonlardan və sümük keçiriciliyi sensorundan alınan məlumatları maşın öyrənməsi alqoritmləri ilə birləşdirərək istifadəçinin səsini fon səs-küyündən ayırmağa çalışır.
Uyğun Galaxy smartfon və planşetlərinə qoşulduqda əlavə funksiyalar da aktivləşir. İstifadəçi səsli komanda ilə qulaqcıqlardan Gemini Live xidmətini işə sala, uzun basmaqla isə Quick Voice Memo vasitəsilə səsli qeyd yarada bilər. Saxlanılan qeydləri sonradan Bixby vasitəsilə axtarmaq mümkündür.
Galaxy Buds On baş hərəkətləri ilə idarəetməni də dəstəkləyir. Başla işarə etməklə zəngi qəbul etmək və ya bitirmək, eləcə də siqnalı söndürmək və bildirişi dinləmək mümkündür.
Samsung Galaxy Buds On Cənubi Koreyada 27 oktyabrda satışa çıxacaq. Qulaqlıqların qiyməti 299 000 von, yəni təxminən 220 dollar təşkil edir. İlk mərhələdə yalnız qara rəngli versiya satışda olacaq. Samsung daha sonra modeli digər bazarlarda da təqdim etməyi planlaşdırır, lakin həmin ölkələr üçün satış tarixləri və qiymətlər hələ açıqlanmayıb.
