Hollivudda tarixi sövdələşmələrdən biri başa çatıb. Paramount Warner Bros. Discovery-ni 110 milyard dollara satın alaraq şirkətlə birləşib və nəticədə Skydance adı altında yeni nəhəng əyləncə şirkəti formalaşıb.
Bu birləşmə kino və televiziya sənayesinin ən böyük sövdələşmələrindən biri hesab olunur. Yeni şirkətin tərkibinə iki böyük striminq platforması — Paramount+ və HBO Max — ilə yanaşı, CBS, CNN, MTV, TBS, Comedy Central və Food Network kimi məşhur televiziya şəbəkələri də daxil olub.
Birləşmə ilə Skydance dünyanın ən tanınmış film və serial franşizalarına da nəzarət əldə edib. Bunların arasında “The Lord of the Rings”, “Game of Thrones”, DC Universe və “Yellowstone” kimi nəhəng layihələr var. Yeni şirkətin rəhbərliyində əsas fiqur isə Devid Ellison olacaq. O, artıq ötən il Skydance Media ilə Paramount-un birləşməsini həyata keçirərək şirkətdəki təsirini əhəmiyyətli dərəcədə artırmışdı. Ellison ailəsi hazırda Skydance-in ən böyük səhmdarıdır və onun atası, Oracle şirkətinin həmtəsisçisi Larri Ellisonun milyardlarla dollarlıq sərvəti də bu biznesin arxasındakı əsas maliyyə dayaqlarından biridir.
Sövdələşmənin tamamlanmasına qədər şirkətlər bir sıra hüquqi maneələrlə üzləşmişdi. ABŞ-ın bir neçə ştatı və Hollivud ssenaristlər həmkarlar ittifaqı ilə aparılan razılaşmalar əsas hüquqi problemlərin aradan qaldırılmasına imkan verib.
Maraqlıdır ki, Warner Bros. uğrunda mübarizədə Paramount-un əsas rəqibi Netflix idi. Netflix daha əvvəl Warner Bros.-un kino və televiziya studiyaları ilə striminq biznesini almaq barədə razılığa gəlmişdi. Lakin Paramount daha sərfəli təklif irəli sürərək rəqabətdə üstünlük qazanıb və nəticədə sövdələşməni özü tamamlayıb.
Yeni Skydance şirkətinin illik gəlirinin 70 milyard dollara yaxın olacağı gözlənilir. Şirkətin B sinfi səhmləri isə artıq Nyu-York Fond Birjasında “SKYD” tickeri ilə satılmağa başlayacaq.
