Google Fitbit məhsul ailəsinə yeni Fitbit Edge fitnes qolbağını əlavə edib. AMOLED ekranı, daxili GPS sistemi və geniş sensor dəsti ilə seçilən cihaz məşqləri izləmək, gündəlik fiziki aktivliyi ölçmək və sağlamlıq göstəricilərini nəzarətdə saxlamaq üçün nəzərdə tutulub. Ən diqqətçəkən xüsusiyyətlərindən biri isə şarj doldurmadan bir həftəyədək işləyə bilməsidir.
Fitbit Edge 1,34 düymlük AMOLED ekranla təchiz olunub. Gorilla Glass 3 şüşəsi ilə qorunan ekranın sahəsi Fitbit Charge 6 ilə müqayisədə 46% daha böyükdür. Alüminium korpusun qalınlığı 11,5 mm-dir. Cihaz IP68 və 5 ATM standartlarına uyğun olaraq tozdan və sudan qorunur.
Google-un məlumatına görə, yenilənmiş konstruksiya GPS vasitəsilə mövqenin müəyyənləşdirilməsinin dəqiqliyini 40% artırır. Hündürlüyü ölçmək üçün ayrıca altimetr də nəzərdə tutulub. Qolbağı idarə etmək isə böyük yan düymə vasitəsilə mümkündür.
Fitbit Edge ürək döyüntülərini ölçən sensor, EKQ funksiyası, qanda oksigen səviyyəsini müəyyənləşdirən sensor, giroskop, akselerometr və dəri temperaturu sensoru ilə təchiz edilib. Cihaz 50-dən çox məşq növünü izləyir, 100-dən artıq fiziki aktivliyi avtomatik tanıya bilir və ürək döyüntüsü məlumatlarını ötürmək üçün idman avadanlıqlarına qoşulmağı dəstəkləyir. Süni intellekt isə zamanla istifadəçinin vərdişlərinə uyğunlaşaraq daha fərdiləşdirilmiş təcrübə təqdim etməyə kömək edir. Bundan əlavə, qolbaq bildirişləri göstərir, müxtəlif tətbiqlərdə musiqini idarə edir, taymer və zəngli saat funksiyalarını dəstəkləyir. Google Maps vasitəsilə naviqasiya göstərişləri də təqdim olunur.
Fitbit Edge həm Android, həm də iOS smartfonları ilə uyğun gəlir. Bununla belə, mesajlara birbaşa qolbaqdan cavab vermək yalnız Android cihazlarında mümkündür. NFC modulu olmadığı üçün təmassız ödəniş funksiyası nəzərdə tutulmayıb.
Fitbit Edge ekranın daimi aktiv olmadığı rejimdə bir dəfəyə doldurulmaqla 7 günədək işləyə bilir. Always-On Display funksiyası aktiv olduqda isə batareyanın ömrü təxminən 2 günə enir. Sürətli şarj doldurma da dəstəklənir: cəmi 5 dəqiqəlik şarj təxminən bir günlük istifadə üçün kifayət edir. Batareyanın tam doldurulması isə 90 dəqiqə çəkir.
Fitbit Edge-in qiyməti 179,99 dollar təşkil edir. Qolbaq artıq Google Store-da ilkin sifariş üçün əlçatandır, satışlar isə oktyabrın 27-də başlayacaq.
Əlavə qayışların qiymətləri belədir:
- İdman üçün silikon qayış — 39,99 dollar
- Maqnitli qayış — 59,99 dollar
- Metal qolbaq — 149,99 dollar
Bundan başqa, basketbol ulduzu Stephen Curry ilə əlaqəli xüsusi Stephen Curry Special Edition versiyası da 219,99 dollara satışa çıxarılacaq.
