Xiaomi Çində yeni TV S Pro televizor seriyasını təqdim edib. Şirkətin RGB-Mini LED texnologiyasından istifadə edən ilk televizorları standart və daha təkmil Supreme Edition versiyalarında satışa çıxacaq. Yeni modellər 65, 75, 85 və 98 düymlük ekran ölçüləri ilə təqdim olunur.
Yeni televizorlarda ənənəvi ağ işıqlandırmadan fərqli olaraq qırmızı, yaşıl və mavi rənglər üçün ayrıca işıq mənbələrindən istifadə edilir. Xiaomi bu texnologiyanın BT.2020 rəng məkanının 100%-ni əhatə etdiyini bildirir. Şirkətin məlumatına görə, bir rəngin üstünlük təşkil etdiyi səhnələrdə enerji sərfiyyatı 2026-cı il modelləri ilə müqayisədə təxminən 30% azalır.
Standart versiyalarda maksimal parlaqlıq 5000 nit, Supreme Edition modellərində isə 5500 nit təşkil edir. Lokal qaraltma zonalarının sayı ekran ölçüsündən asılı olaraq 65 düymlük modellərdə 2160-dan 98 düymlük versiyada 4860-a qədər dəyişir. Standart modellərin ekran örtüyündə işığın əks olunması 1,8% olduğu halda, Supreme Edition-da bu göstərici cəmi 0,5%-dir.
Bütün televizorlar 4K təsvir ölçülü panellə, 180 Hz-lik yerli yenilənmə tezliyi, VRR və AMD FreeSync Premium Prodəstəyi ilə təchiz olunub. Supreme Edition modellərində xüsusi rəqabətli oyun rejimi aktivləşdirildikdə yenilənmə tezliyi 360 Hz-ə qədər yüksələ bilir.
Qoşulma imkanlarına dörd HDMI 2.1 portu, onlardan birində eARC dəstəyi, həmçinin Wi-Fi 6, Ethernet və USB daxildir.
Televizorların aparat təminatında Cortex-A73 nüvələrinə malik dördnüvəli prosessor, 4 GB operativ yaddaş və 64 GB daxili yaddaş yer alır. Əməliyyat sistemi kimi yeni HyperOS 4 istifadə olunur.
Modellərdə həmçinin millimetr diapazonlu radar quraşdırılıb. Bu radar izləyicinin ekrana nisbətən mövqeyini müəyyən edərək görüntü və səs parametrlərini avtomatik uyğunlaşdıra bilir. Supreme Edition versiyalarında isə rənglərin emalı və arxa işıqlandırmanın LCD təbəqəsi ilə sinxron işləməsinə cavabdeh XM9000 çipi də istifadə edilir.
Səs sistemi də iki versiya arasındakı əsas fərqlərdən biridir. Adi TV S Pro RGB-Mini LED 2027 modellərində Harman tərəfindən sazlanmış 130 vatt gücündə 2.1.2 audio sistemi, yuxarı istiqamətli dinamiklər və sabvufer quraşdırılıb. Supreme Edition isə 170 vatt gücündə 4.1.2 səs sistemi ilə təchiz olunub. Burada əlavə sol və sağ kanallar, Dolby Atmos dəstəyi və Harman sazlaması mövcuddur.
Televizorların metal korpusu da kifayət qədər nazikdir: 65 düymlük versiyanın qalınlığı 49,7 mm, 98 düymlük modelin qalınlığı isə 54,9 mm-dir. Uyğun divar qurğusundan istifadə edildikdə ekranla divar arasında cəmi 5 mm məsafə qalır.
Xiaomi TV S Pro RGB-Mini LED 2027 seriyasının qiyməti 65 düymlük standart model üçün təxminən 894 dollardan başlayır və 98 düymlük versiyada 1937 dollara çatır. Supreme Edition modelləri isə təxminən 939 dollardan başlayır, 98 düymlük versiyanın qiyməti isə 2 085 dollar təşkil edir.
