Xiaomi qatlanan smartfon bazarına yeni Xiaomi 18 Fold modeli ilə qayıdıb. Yeniliyin əsas xüsusiyyəti daha geniş korpus və bir-birinə yaxın ekran nisbətləridir. Bundan əlavə, Xiaomi 18 Fold şirkətin yeni XRING O3 prosessoru və yeni nəsil LPDDR6 operativ yaddaşı ilə təchiz olunan ilk kommersiya cihazıdır.
Xiaomi 18 Fold-un xarici ekranının diaqonalı 5,38 düym, daxili ekranın diaqonalı isə 7,58 düymdür. Hər iki panel LTPO OLED texnologiyasına əsaslanır, 1–120 Hz adaptiv yenilənmə tezliyini və 4000 nit-ə qədər maksimal parlaqlığı dəstəkləyir. Ekranların tərəf nisbəti təxminən 2:1 təşkil edir.
Şirkətin sözlərinə görə, smartfon qatlanmış vəziyyətdə istifadə edilərkən ekran klaviaturası adi 6,9 düymlük smartfonlarla müqayisədə 8% daha genişdir. Açılmış vəziyyətdə cihazın qalınlığı cəmi 5,02 mm, qatlanmış halda isə 10,68 mm təşkil edir. Çəkisi 219 qramdır.
Qatlama mexanizmi üçün Xiaomi Dragon Bone Hinge şarnirinin yeni versiyasından istifadə edib. Ekrandakı qat izini azaltmaq məqsədilə ikiqat ultra nazik elastik şüşə tətbiq olunub. Şirkət müxtəlif bucaqlarda və fərqli şəraitlərdə aparılan sınaqların nəticələrinə əsasən konstruksiyada 492 optimallaşdırma həyata keçirdiyini bildirir. Korpus 7-ci seriya alüminium ərintisindən hazırlanıb, xarici ekran isə Dragon Crystal Glass 3.0 şüşəsi ilə qorunur.
Xiaomi 18 Fold-un əsas aparat platformasını TSMC-nin 3 nanometrlik texnologiyası ilə hazırlanmış XRING O3 prosessoru təşkil edir. Xiaomi-nin testlərinə əsasən, bu çip hazırda mobil cihazlar üçün ən güclü prosessorlardan biridir. Smartfon həmçinin LPDDR6 yaddaşla təchiz olunan ilk kommersiya cihazıdır.
Enerji təminatı üçün 6000 mAh tutumlu, 20% silikon tərkibli akkumulyator nəzərdə tutulub. Cihaz 67 Vt naqilli və 50 Vt naqilsiz sürətli şarj doldurmanı dəstəkləyir.
Xiaomi 18 Fold-un kameraları Leica ilə birgə hazırlanıb. Əsas kamera optik stabilizasiyaya malik 200 MP sensorla təchiz olunub. Bundan əlavə, 50 MP telefoto kamera 3,5 qat optik yaxınlaşdırma, digər 50 MP modul isə genişbucaqlı çəkiliş imkanı təqdim edir.
Smartfon HyperOS 4 əməliyyat sistemi ilə işləyir. Qatlanan ekranın imkanlarından daha səmərəli istifadə etmək üçün çoxfunksiyalılıq sistemi yenilənib və ekranda eyni vaxtda 6 tətbiqə qədər yerləşdirmək mümkündür. Digər xüsusiyyətlər arasında Wi-Fi 7, USB Type-C 3.2 Gen 2, infraqırmızı ötürücü və yan tərəfdə yerləşən barmaq izi skaneri var.
Xiaomi 18 Fold artıq Çində ilkin sifariş üçün əlçatandır. Smartfonun satışları 10 sentyabrda başlayacaq. Qiymətlər 12/256 GB versiyası üçün təxminən 1 639 dollardan başlayır. 16 GB RAM və 1 TB yaddaşa malik top versiya təxminən 2 235 dollar qiymətindədir.
Bundan əlavə, cəmi 1 500 ədəd istehsal olunacaq keramika versiyası da təqdim edilib. Onun qiyməti 2 384 dollar təşkil edir.
