Huawei Çində keçirilən təqdimatda yeni Pura X View smartfonunu nümayiş etdirib. Pura X seriyasının əvvəlki modellərindən fərqli olaraq, yeni cihaz qatlanan smartfon deyil, klassik monoblok dizaynına malikdir. Onun əsas xüsusiyyəti isə qeyri-adi dərəcədə enli korpusu və fərqli ekran nisbətidir.
Pura X View 6,39 düymlük OLED ekranla təchiz olunub. Panelin təsvir ölçüsü 2232 × 1320 piksel, yenilənmə tezliyi isə 120 Hz-dir. Ekranın 16:9,5 nisbəti smartfonu adi modellərdən daha enli edir. Çərçivələrin qalınlığı cəmi 1,05 mm, maksimal parlaqlıq isə 6500 nit təşkil edir. Bundan əlavə, ekran 2160 Hz PWM tezliyini dəstəkləyir.
Smartfonun qalınlığı 6,68 mm, çəkisi isə 201 qramdır. Korpus IP68 və IP69 səviyyəsində suya və toza davamlıdır.
Əsas kamera 200 MP RYYB sensor üzərində qurulub. 1/1,28 düymlük sensor f/1.8 diafraqmaya və optik görüntü sabitləşdirməsinə malikdir. Kameraya həmçinin 3,7x optik zumlu 50 MP teleobyektiv, 112° baxış bucağına malik 8 MP ultra genişbucaqlı modul və makro çəkiliş funksiyası daxildir. Rənglərin daha dəqiq ötürülməsi üçün ayrıca Red Maple rəng sensoru da nəzərdə tutulub.
Performansa Kirin 9030S prosessoru cavabdehdir. Çipin soyudulması üçün böyük buxar kamerasından istifadə edilir. Smartfon 12 GB operativ yaddaş və 256 GB, 512 GB və ya 1 TB daxili yaddaş variantları ilə satışa çıxacaq.
Pura X View şirkətin yeni HarmonyOS 7 əməliyyat sistemi ilə işləyir. Cihazın digər diqqətçəkən xüsusiyyəti isə 7000 mAh tutumlu, silikon anod texnologiyasına əsaslanan batareyadır. O, 66 Vt sürətli naqilli və 50 Vt naqilsiz şarjı dəstəkləyir.
Huawei Pura X View Çində 9 sentyabrda satışa çıxacaq. 256 GB versiyanın qiyməti 894 dollar, 512 GB model 1 043 dollar, 1 TB variant isə 1 266 dollar təşkil edir.
