HUAWEI öz HarmonyOS əməliyyat sistemi ilə işləyən noutbuklar siyahısını genişləndirərək yeni Qingyun HM940 modelini təqdim edib. Bu model sensorlu OLED ekran, güclü səs sistemi və HUAWEI ekosisteminə dərindən inteqrasiya olunması ilə fərqlənir.
Şirkət prosessorun və qrafik kartın dəqiq modelini açıqlamasa da, digər texniki göstəricilər məlumdur. Operativ yaddaş konfiqurasiyadan asılı olaraq 24 və ya 32 GB təşkil edir, daxili yaddaş isə 512 GB və ya 1 TB-dır. 14.2 düymlük ekran 3120×2080 piksel təsvir ölçüsünə və 120 Hz yenilənmə tezliyinə malikdir. Ekran 100% sRGB rəng gamutunu dəstəkləyir və maksimal parlaqlığı 1000 nit-ə qədərdir.
Noutbukun ölçüləri 310 x 222 x 13.5 mm-dir, çəkisi isə cəmi 970 qramdır. Səs keyfiyyətinə HUAWEI Sound sistemi cavabdehdir – altı dinamik və dörd mikrofonla təchiz olunub. 70 Vatt-saatlıq batareya 140 Vatt gücündə sürətli şarjı dəstəkləyir – cəmi 30 dəqiqəyə 70% enerji toplayır. Portlar sırasında üç USB Type-C girişi, Wi-Fi 7 və Bluetooth 5.2 modulları mövcuddur.
Noutbukun diqqətçəkən xüsusiyyətlərindən biri də Super Celia Business AI adlı süni intellekt funksiyaları paketidir. Bu paketə təqdimatların avtomatik hazırlanması, şəkillərdən mətn çıxarılması və səsli idarəetmə kimi imkanlar daxildir. Hətta kursor istifadəçinin baxış istiqamətini izləyərək noutbukdan eyni markalı smartfona keçə bilir.
HUAWEI Qingyun HM940 modelinin satış qiyməti və buraxılış tarixi hələ açıqlanmayıb.
