Honor, Samsung-un yeni flaqman modeli Galaxy S25 Edge-ə qarşı cəsarətli reklam kampaniyası ilə çıxış edib. Səbəb isə Samsung-un cihazının cəmi 5,8 mm qalınlıqla “ən nazik smartfon” olduğunu iddia etməsidir.
Honor isə dərhal cavab verərək qeyd edib ki, onun qatlanan smartfonu Magic V3 tam açıq vəziyyətdə cəmi 4,35 mm qalınlığındadır. Ən önəmlisi isə — şirkət vurğulayıb ki, bu naziklik əsas funksionallıqdan imtina hesabına əldə olunmayıb, əksinə, cihaz yüksək göstəricilərini qoruyub saxlayır.
Məsələn, Galaxy S25 Edge 3900 mAh tutumunda batareya ilə təchiz olunub, halbuki Magic V3-də bu göstərici 5150 mAh-dir. Honor-un şüarı da məhz buna işarə edir: “Nazik, amma hiyləsiz” — yəni, Samsung-un görünüş naminə enerji tutumundan imtina etdiyini iddia edir.
Əlbəttə, klassik smartfonla qatlanan modeli birbaşa müqayisə etmək tam ədalətli deyil, amma bu cür marketinq döyüşləri texnologiya sənayesində getdikcə daha çox yayılır.
