Samsung Galaxy S23 seriyalı smartfonlar haqqında çoxlu şayiələrdən sonra şirkət nəhayət onların elan tarixini təsdiqlədi. Düzdür, bu, bilmədən və vaxtından əvvəl baş verdi, çünki müvafiq tizer yalnız korporasiyanın Kolumbiya bölməsinin saytında peyda oldu.
Tizerə əsasən, Galaxy Unpacked tədbiri 2023-cü il fevralın 1-nə planlaşdırılıb. Bundan əlavə, qarşıdan gələn smartfonlar haqqında ətraflı məlumat hələlik yoxdur — yalnız yeni mobil çəkiliş imkanlarına və gələcək cihazların dizaynına işarə edən üç arxa kamera sensoru göstərilir. Qeyd edək ki, kameralar hər üç flaqman modelində belə dizayn ediləcək: Galaxy S23, S23+ və S23 Ultra.
Şayiələrin sayəsində məlum olub ki, ən yüksək səviyyəli Samsung Galaxy S23 Ultra 200 meqapiksellik kamera alacaq və şirkət qalan iki modeli 50 meqapiksellik əsas modulla təchiz edəcək. Bütün cihazların Qualcomm Snapdragon 8 Gen 2 prosessoruna əsaslanacağı gözlənilir. İlkin məlumata görə, bu il Exynos çipində heç bir dəyişiklik olmayacaq (bunun doğru olub-olmadığını yaxın zamanda öyrənəcəyik).
Bizi Telegram kanalımızdan da izləyə bilərsiniz. https://t.me/infocity_az
