IFA 2016 sərgisi üçün Acer şirkəti baha olmayan yeni Liquid seriyalı smartfonları təqdim edib.
Kiçik model olan Liquid Z6 5-düymlük HD ekran, 2 və 8 meqapiksellik kameralar, MediaTek MT6737 tipli 4 nüvəli prosessor, 1 GB əməliyyat və 8 GB daxili yaddaş ilə təchiz edilib.
Digər model, Acer Liquid Z6 Plus isə arxa metal paneli ilə seçilir. 5.5-düymlük Full HD ekrana malik bu smartfon 5 və 13 meqapiksellik kameralar ilə təchiz olunub. 8 nüvəli MediaTek MT6753 tipli prosessor 3 GB əməliyyat yaddaşı və 32 GB daxili yaddaş ilə birlikdə cihazın fəaliyyətini qüsursuz edir. Qeyd etmək lazımdır ki, smartfonun batareyası da olduqca həcmlidir — 4080 mAh.
Hər iki smartfon Android 6.0 Marshmallow əməliyyat sistemi ilə çalışacaq. Z6 modelinin qiyməti 130 dollar, Z6 Plus modelinin qiyməti isə 180 dollar təşkil edəcək.
