Apple oktyabrın 13-də Nyu-Yorkda yeni məhsullarına həsr olunmuş tədbir keçirəcəyini açıqlayıb. Bakı vaxtı ilə saat 17:00-da başlayacaq tədbir “Welcome home” (“Evə xoş gəlmisiniz”) şüarı altında keçiriləcək.
Şirkət təqdim olunacaq məhsulların siyahısını hələ açıqlamayıb. Bununla belə, tədbirin şüarı Apple-ın bu dəfə ağıllı ev ekosisteminə xüsusi diqqət yetirəcəyinə işarə edir.
Welcome home. October 13. https://t.co/ChelGSDOTI
— Greg Joswiak (@gregjoz) October 8, 2026
Gözləntilərə görə, təqdimatın əsas yeniliklərindən biri HomePad adlı yeni cihaz ola bilər. Ekranla təchiz ediləcəyi gözlənilən bu məhsul ağıllı evin mərkəzi idarəetmə sistemi rolunu oynaya bilər. Bununla yanaşı, Apple-ın ikinci nəsil HomePod mini ağıllı dinamikini və yenilənmiş Apple TV qurğusunu da nümayiş etdirəcəyi ehtimal olunur. Şayiələrə əsasən, yeni cihazlar Siri AI ağıllı köməkçisi ilə inteqrasiya olunacaq. Bu isə istifadəçilərə evdəki uyğun cihazları səsli əmrlərlə idarə etmək və ağıllı ev funksiyalarından daha rahat yararlanmaq imkanı verə bilər.
Apple-ın ağıllı ev planları bununla da məhdudlaşmaya bilər. Şirkətin LG ilə birlikdə videodomofon, termostat və ev daxilində istifadə üçün müşahidə kamerası kimi yeni məhsullar üzərində işlədiyi bildirilir. Bu cihazların oktyabrın 13-də nümayiş olunub-olunmayacağı isə hələ məlum deyil.
Tədbirin formatı da açıqlanmayıb. Apple tammiqyaslı onlayn təqdimat keçirə, yaxud yeni məhsullarını ayrıca videolar və rəsmi press-relizlər vasitəsilə elan edə bilər.
