Range Rover markasının ilk seriyalı elektromobili təqdim olunub. Yeni Range Rover Electric modelin ənənəvi dizaynını və yolsuzluq imkanlarını qoruyub, lakin daxiliyanma mühərrikinin yerinə iki elektromotorlu tam ötürücülü sistem əldə edib.
Elektromobilin hər oxunda bir olmaqla iki daimi maqnitli sinxron mühərrik quraşdırılıb. Onların ümumi gücü 542 at gücünə, maksimal fırlanma anı isə 850 Nm-ə çatır. Bu, Range Rover tarixində ən yüksək fırlanma anıdır. Avtomobil 0-dan 100 km/saat sürətə 4,3 saniyəyə, 80-dən 120 km/saatadək isə 2,7 saniyəyə sürətlənir.
Range Rover Electric 118,5 kVt/saat tutumlu akkumulyator ilə təchiz edilib. Batareya 344 prizmatik elementdən ibarətdir və 800 voltluq elektrik arxitekturasından istifadə edir. Sabit cərəyanla 350 kVt-a qədər sürətli şarj yığmanı dəstəkləyən sistem batareyanı 10%-dən 80%-ə təxminən 22 dəqiqəyə doldurur. Cəmi 10 dəqiqəlik şarj isə təxminən 200 km məsafə üçün enerji təmin edir.
EPA standartına əsasən maksimal yürüş ehtiyatı təxminən 536 km təşkil edir.
Elektrik mühərriklərinə keçid Range Rover Electric-in yolsuzluq qabiliyyətinə ciddi təsir göstərməyib. Integrated Traction Management sistemi elektromotorların fırlanma sürətini cəmi 50 millisaniyədə tənzimləyir. Intelligent Driveline Dynamics isə fırlanma anının 0%-dən 100%-ə qədərini arxa oxa yönləndirə bilir.
Single Pedal rejimində elektromobil 33 dərəcəyədək yoxuşları və 45 dərəcəyədək enişləri dəf edə bilir. Maksimal su keçidi dərinliyi isə 89 santimetrdir.
Range Rover Electric üçün sifarişlər artıq ABŞ-da qəbul edilir. Modelin başlanğıc qiyməti çatdırılma xərcləri nəzərə alınmadan 138 000 dollar təşkil edir. Batareya və elektromotorlara 8 il və ya 161 min kilometr zəmanət verilir.
