Instagram süni intellektlə yaradılmış insanları göstərən profillərlə bağlı qaydaları sərtləşdirir. Platforma AI ilə yaradılmış profillərin lazımi qaydada qeyd olunmadığı hallarda onların əhatə dairəsini məhdudlaşdırmağa başlayacaq.
Şirkət mövcud “AI creator” etiketinin adını “AI-generated profile” olaraq dəyişir. Instagram hesab edir ki, yeni ad istifadəçilərə profilin arxasında real insanın deyil, süni intellektlə yaradılmış və ya böyük ölçüdə AI vasitəsilə hazırlanmış personajın dayandığını daha aydın izah edəcək.
Yeni qaydalara əsasən, AI ilə yaradılmış şəxsi profilində göstərən yaradıcılar bunu düzgün şəkildə qeyd etməsələr, onların paylaşımlarının daha az istifadəçiyə çatması mümkündür. Əksinə, yeni etiketdən istifadə edən hesablar sırf AI personajından yararlandıqları üçün cəzalandırılmayacaq.
Lakin bu etiket süni intellektdən istifadə edilən bütün məzmunlara şamil olunmur. Məsələn, fotoları AI ilə redaktə etmək, mətnləri yaxşılaşdırmaq, qrafika hazırlamaq və digər yaradıcı dəyişikliklər etmək üçün ayrıca “AI-generated profile”etiketi tələb olunmayacaq.
Instagram bildirir ki, bu dəyişiklik istifadəçilərin real insan profili təsiri bağışlayan, lakin sonradan tamamilə AI tərəfindən yaradıldığı məlum olan hesablarla bağlı narazılıqlarına cavab olaraq hazırlanıb.
Generativ süni intellekt sosial şəbəkələrdə daha geniş yayıldıqca AI influenserlərin sayı da artır. Bu isə istifadəçilərin qarşılarında real insanın, yoxsa süni intellektin yaratdığı virtual personajın olduğunu anlamasını çətinləşdirir.
Sağlamlıq və gözəllik mövzulu məzmun isə daha ciddi risk yaradır. Məlumatlara görə, sosial şəbəkələrdə AI tərəfindən yaradılmış həkimlər, terapevtlər və sağlamlıq influenserləri qida əlavələrini reklam edir və istifadəçilərə müxtəlif tibbi iddialar təqdim edirlər. Belə profillərin real mütəxəssis kimi qəbul edilməsi yanlış məlumatların yayılmasına səbəb ola bilər.
Instagram-ın yeni qərarı Meta-nın süni intellekt alətləri ilə bağlı son dövrdə üzləşdiyi narazılıqlardan sonra gəlib. Şirkət daha əvvəl istifadəçilərə digər insanların xarici görünüşündən istifadə etməklə AI şəkilləri yaratmağa imkan verən funksiyanı təqdim etmişdi. İstifadəçilərin etirazından sonra Meta həmin funksiyanı platformadan silmişdi.
