Çinli avtomobil istehsalçısı Geely, yeni Galaxy A7 qoşulan hibrid modelinin ilkin satışlarına start verib. GEA platformasında qurulan və yeni nəsil EM-i AI Super Hybrid 2.0 sistemi ilə təchiz olunan A7, Galaxy seriyasının bu texnologiyanı alan ilk modeli olub. Avtomobilin əsas üstünlüyü — tam enerji (şarj) ilə 2100 km-dən çox məsafə qət edə bilməsidir.
Galaxy A7-nin mühərrik bölməsində 1,5 litrlik benzinli (82 kVt) və 175 kVt gücündə elektrik mühərrikindən ibarət hibrid sistem yerləşir. Avtomobil 0-dan 100 km/saat sürətə 7,1 saniyədə çatır. Qarışıq CLTC dövrünə əsasən yanacaq sərfiyyatı cəmi 2,67 litr/100 km-dir. Model 8,5 və 18,4 kVtsaatlıq iki batareya variantı ilə təklif olunur ki, bu da yalnız elektriklə uyğun olaraq 70 və 150 km məsafə deməkdir.
Ölçülərinə görə Galaxy A7 sinifindəki bir çox rəqibləri, o cümlədən BYD Qin L modelini qabaqlayır: uzunluğu — 4918 mm, eni — 1905 mm, təkər bazası — 2845 mm-dir. Avtomobilin dizaynında aerodinamik forması (cəmi 0,229 Cd müqavimət əmsalı), 196 piksellik LED işıq zolağı və 19 düymlük disklər diqqət çəkir.
Salon hissəsində Meizu ilə birlikdə hazırlanmış Flyme Auto ağıllı sistemi quraşdırılıb. Sistem səsli idarəetməni və HUAWEI HiCar dəstəyini təmin edir. Avtomobilin daxilində 15,4 düymlük əsas ekran, rəqəmsal göstəricilər paneli və proyeksiya ekranı mövcuddur. Panoramik lyuk, ikiqat simsiz şarj doldurma, eləcə də masaj və ventilyasiya funksiyalı oturacaqlar avtomobilin rahatlığını tamamlayır. Oturacaqlar qatlandıqda baqaj həcmi 988 litrə çatır.
Sürücüyə kömək sistemləri arasında G-Pilot H3 kompleksi yer alır. Bu sistem avtomatik parklama və magistral yollarda avtonom idarəetmə funksiyalarını təklif edir. Ən üst versiyada isə 16 dinamikdən ibarət Flyme Sound audio sistemi mövcuddur.
Galaxy A7 beş fərqli komplektasiyada təqdim olunur. Qiymətlər 103 800 – 133 800 yuan (təxminən 14 500 – 18 650 ABŞ dolları) arasında dəyişir.
