Dünyanın ən populyar mesajlaşma platformalarından biri olan WhatsApp yeni inkişaf mərhələsinə hazırlaşır. Hazırda 3 milyarddan çox insanın istifadə etdiyi tətbiqə zamanla icmalar, kanallar, hekayələr və biznes alətləri kimi çoxsaylı funksiyalar əlavə edilib. Lakin bu genişlənmə tətbiqin istifadəsini də mürəkkəbləşdirib.
Bu vəziyyəti dəyişmək istəyən WhatsApp-ın yeni rəhbəri Kunal Shah platformanın həm özünü, həm də onun daxilində həyata keçirilən əməliyyatları daha sadə və rahat etməyi planlaşdırır. O, çərşənbə axşamı paylaşdığı açıqlamada səsli mesajlar, qruplar, stikerlər və video funksiyalarının daha rahat və ifadəli olacağını bildirib.
Shahın planları bununla məhdudlaşmır. WhatsApp istifadəçilərə birbaşa tətbiq daxilində məhsulları araşdırmaq və alış-veriş etmək imkanı verən ekosistemi də genişləndirmək istəyir. Yeni rəhbərin açıqlamasından məlum olur ki, şirkət ödəniş xidmətləri və telekommunikasiya operatorları ilə əməkdaşlıq etməyi planlaşdırır. Bu tərəfdaşlıqlar vasitəsilə istifadəçilər kommunal və digər hesabları ödəyə, kredit əldə edə, eləcə də eSIM ala biləcəklər.
Süni intellekt də WhatsApp-ın gələcək planlarında mühüm yer tutacaq. Şirkət AI vasitəsilə istifadəçilər üçün vacib məlumatların tapılmasını və gündəlik işlərin daha asan yerinə yetirilməsini istəyir. Kunal Shahın sözlərinə görə, süni intellekt lazım olan məlumatı tez tapmalı, tapşırıqları yerinə yetirməli, istifadəçilərin rezervasiyaları və görüşləri unutmamasına kömək etməlidir. Onun fikrincə, yaxşı texnologiyanın əsas məqsədi insanlara vaxt qazandırmaq və onları vacib ünsiyyətə daha çox vaxt ayırmağa imkan verməkdir.
Hazırda WhatsApp-ın süni intellekt köməkçisi mesajları ümumiləşdirə və söhbətlərin məzmununa əsasən cavab mətnləri hazırlaya bilir. Lakin şirkətin Muse adlı AI agentindən məlumatları toplamaq və istifadəçilərə xatırlatmalar göndərmək üçün istifadə edib-etməyəcəyi hələ məlum deyil.
Bununla yanaşı, yeni rəhbər məxfilik və təhlükəsizliyin dəyişməz qalacağını xüsusi vurğulayıb. Onun sözlərinə görə, istifadəçilərin şəxsi mesajları və zəngləri əvvəlki kimi başdan-başa şifrələnəcək (end-to-end encryption). WhatsApp sadəlik, etibarlılıq və məxfilik prinsiplərindən imtina etməyi planlaşdırmır.
