Qualcomm yeni nəsil flaqman smartfonlar üçün nəzərdə tutulan Snapdragon 8 Elite Gen 6 və Snapdragon 8 Elite Extreme Gen 6 mobil platformalarını təqdim edib. Yeni çiplər xüsusilə oyunlarda və süni intellektlə bağlı tapşırıqlarda daha yüksək performans təmin etməyə yönəlib.
Yeni platformaların əsas texnoloji xüsusiyyətləri arasında 2 nanometrlik istehsal prosesi və Qualcomm-un Oryon prosessor nüvələrindən istifadə edilməsi var. CPU iki böyük nüvədən ibarətdir və onların maksimal tezliyi 5 GHz-ə çatır. Bundan əlavə, 4 GHz-ə qədər işləyən altı məhsuldar nüvə mövcuddur. Prosessor 16 MB həcmində Oryon Flex keş ilə təchiz olunub.
Qualcomm-un məlumatına görə, yeni çiplərdə CPU performansı əvvəlki nəsillə müqayisədə 13% artıb, enerji sərfiyyatı isə 37% azalıb. Lokal neyroprosessorun AI tapşırıqlarını emal sürəti də 35% yüksəlib. Yeni sistem smartfonlarda 30 milyarddan çox parametrə malik Mixture of Experts (MoE) arxitekturalı mürəkkəb süni intellekt modellərini işlədə bilir.
İki platforma arasındakı əsas fərqlər qrafik imkanları və video çəkilişi sahəsində özünü göstərir.
Snapdragon 8 Elite Gen 6 qrafik performansında 35%-lik artım, 12 MB ayrılmış yaddaş, 8K 30 kadr/s və 4K 120 kadr/s video çəkilişi dəstəyi ilə gəlir.
Daha güclü Snapdragon 8 Elite Extreme Gen 6 isə GPU performansını 44% artırır və 18 MB ayrılmış yaddaş əldə edir. Çipdə Adreno Matrix Cores adlı AI nüvələri, Unreal Engine 5 MegaLights texnologiyası və Mixture of Experts modelləri üçün genişləndirilmiş dəstək də mövcuddur. Video çəkilişi imkanları isə 8K 60 kadr/s və 4K 240 kadr/s səviyyəsinə çatır.
Hər iki platforma 24 GB-a qədər LPDDR6 operativ yaddaş, UFS 5.0 yaddaş, USB 3.1 Gen 2 portları, 4K 120 Hz və QHD+ 240 Hz ekranlar, həmçinin 320 MP-ə qədər kameralar üçün dəstək təqdim edir.
Rabitə imkanlarına isə Qualcomm X105 modem cavab verir. O, 5G Advanced, birbaşa peyk rabitəsinə qoşulma, Wi-Fi 8və Bluetooth 6.0 standartlarını dəstəkləyir.
Qualcomm-un yeni çipləri əsasında hazırlanmış ilk kommersiya smartfonlarının 2026-cı ilin sonuna qədər satışa çıxacağı gözlənilir.
