Honor yeni flaqman seriyasının daha bir modelini — Magic9 Super Edition smartfonunu təqdim edib. Yeni cihaz böyük tutumlu batareyası, güclü aparat təminatı, aktiv soyutma sistemi və inkişaf etdirilmiş kamera imkanları ilə seçilir.
Smartfon 6,81 düymlük düz OLED ekran ilə təchiz olunub. Panelin təsvir ölçüsü 2788×1280 piksel, yenilənmə tezliyi 120 Hz, maksimal lokal parlaqlığı isə 10 000 nit təşkil edir. Ekranın qlobal parlaqlığı 2000 nitə çatır. Həmçinin gözlər üçün titrəməni azaltmağa kömək edən 3840 Hz PWM dəstəyi mövcuddur.
Performansa əvvəlki nəsildə istifadə olunan Snapdragon 8 Elite Gen 5 prosessoru cavabdehdir. Çip LPDDR5X operativ yaddaş və UFS 4.1 daxili yaddaşla birlikdə çalışır. Yüksək yüklənmə zamanı temperaturu nəzarətdə saxlamaq üçün smartfonda daxili kuler və buxarlandırma kamerasından ibarət aktiv soyutma sistemi quraşdırılıb.
Magic9 Super Edition-un əsas xüsusiyyəti isə 11 000 mAh batareyadır. Bu, Magic seriyasındakı smartfonlar arasında ən böyük batareya tutumudur. Cihaz 80 vatt naqilli və 50 vatt naqilsiz şarj doldurma funksiyasını dəstəkləyir. Bundan əlavə, sürətli naqilli əks şarj doldurma funksiyası sayəsində digər cihazları da smartfonun batareyasından enerji ilə təmin etmək mümkündür.
Kamera sistemi də kifayət qədər iddialıdır. Əsas kamera 1/1,55 düymlük Samsung S5KHP5 200 MP sensor, f/1.9 diafraqma və optik stabilizasiya ilə təchiz olunub. Onu Sony LYTIA 500 sensoruna əsaslanan 50 MP telekamera tamamlayır. Bu modul 3 dəfə optik yaxınlaşdırma və OIS dəstəyi təqdim edir.
Üçüncü kamera 12 MP ultra genişbucaqlı moduldur və avtomatik fokuslama imkanına malikdir. Ekrana inteqrasiya edilmiş ön kamera isə 50 MP təsvir ölçüsünə və 90 dərəcə baxış bucağına malikdir.
Smartfon Android 17 əsasında hazırlanmış MagicOS 11 əməliyyat sistemi ilə işləyir. Digər imkanlar arasında Wi-Fi 7, Bluetooth 6.0, NFC, infraqırmızı port və ekranaltı optik barmaq izi skaneri var. Korpus IP68, IP69 və IP69K standartlarına uyğun su və toz qorumasına malikdir.
Honor Magic9 Super Edition üçün Çində müəyyən edilən qiymətlər belədir:
- 12 + 256 GB — 4499 yuan (670 dollar);
- 12 + 512 GB — 4999 yuan (745 dollar);
- 16 + 512 GB — 5499 yuan (819 dollar).
