Apple yeni AirPods 5-i təqdim edib. Şirkət yeni nəsil açıq tipli qulaqlıqlarında səs keyfiyyətini və aktiv səs-küyboğma (ANC) sistemini əhəmiyyətli dərəcədə təkmilləşdirib. Lakin əsas yeniliklər bununla bitmir — qulaqlıqlar artıq Siri ilə əllər sərbəst şəkildə işləyə, hətta müxtəlif dillərdə danışan insanlar arasında canlı tərcümə apara bilir.
Apple-ın məlumatına görə, AirPods 5 açıq konstruksiyalı qulaqlıqlar arasında ən güclü aktiv səs-küyboğma sistemlərindən birinə sahibdir. Yeni ANC sistemi AirPods 4 ilə müqayisədə kənar səsləri 50%-ə qədər daha çox azaldır.
Şəffaflıq rejimi də yenilənib. Sistem insan səslərini və ətrafdakı səsləri daha təbii şəkildə ötürür. Bundan əlavə, Adaptiv səs funksiyası ANC və şəffaflıq rejimini dinamik şəkildə birləşdirərək istifadəçinin olduğu mühitə uyğun səs səviyyəsini avtomatik tənzimləyir.
Siri ilə daha çox imkan
AirPods 5-də Siri ilə danışmaq üçün smartfona toxunmağa ehtiyac yoxdur. İstifadəçi səsli komanda ilə mahnı qoşa, müəyyən ünvana marşrut qura və bəzi üçüncü tərəf tətbiqləri ilə qarşılıqlı əlaqə yarada bilər. Məsələn, Siri vasitəsilə WhatsApp-da müxtəlif əməliyyatları yerinə yetirmək mümkündür.
Qulaqlıqların ən diqqətçəkən yeniliklərindən biri isə Canlı tərcümə funksiyasıdır. Apple Intelligence əsasında çalışan bu imkan müxtəlif dillərdə danışan iki şəxsin ünsiyyətini asanlaşdırır və danışığı real vaxtda tərcümə etməyə imkan verir.
5 saata qədər işləmə müddəti
AirPods 5 üçün USB-C portu və naqilsiz şarj doldurma dəstəyi olan yeni şarj qutusu da təqdim edilib. Qulaqlıqların ayaqcığında yerləşən təzyiq sensoru isə idarəetməni, o cümlədən səs səviyyəsinin dəyişdirilməsini daha rahat edir.
Batareya müddəti də artırılıb. Aktiv səs-küyboğma ilə qulaqlıqlar 5 saata qədər, şarj qutusu ilə birlikdə isə ümumilikdə 22 saata qədər işləyə bilir.
AirPods 5-in ABŞ-da qiyməti standart versiya üçün 129 dollar, naqilsiz şarjı dəstəkləyən qutusu olan versiya üçün isə 149 dollar təşkil edir.
