Xiaomi gündəlik istifadə üçün olduqca qeyri-adi aksesuar təqdim edib. Bluetooth Speaker Magnetic Edition adlı yeni portativ səs gücləndiricisi cəmi 95 qram çəkir və smartfonun arxa panelinə maqnitlə birləşə bilir. Üstəlik, cihazı telefon üçün dayaq kimi də istifadə etmək mümkündür.
Səs gücləndiricisinin əsas üstünlüklərindən biri Apple MagSafe ilə tam uyğunluğudur. Bundan başqa, maqnitli aksessuarları dəstəkləyən digər smartfon və qoruyucu örtüklərlə də işləyir.
Xiaomi cihazı istifadəsini mümkün qədər rahatlaşdırıb. Səs gücləndiricisinin daxilində Hall sensoru yerləşdirilib: onu smartfona yaxınlaşdırıb maqnitlə birləşdirən kimi cihaz avtomatik işə düşür, telefondan ayırdıqda isə sönür.
Səs üçün 3 Vt gücündə 1,5 düymlük tam diapazonlu dinamik istifadə olunur. Korpusun xarici hissəsi toxunuş üçün xoş olan hörmə parça ilə örtülüb. Alt hissədə isə cihazın görünüşünə rəng qatan halqavari RGB işıqlandırma yerləşdirilib.
Xiaomi Bluetooth Speaker Magnetic Edition yalnız bir cihaz kimi də istifadə olunmur. İki səs gücləndiricisini birləşdirərək stereo cütlük yaratmaq, istəyə görə isə 10-a qədər belə cihazı vahid audio sisteminə qoşmaq mümkündür.
Kiçik ölçülərinə baxmayaraq, qurğu gündəlik istifadə üçün kifayət qədər davamlıdır. Cihaz IP67 standartına uyğun olaraq tozdan və sudan qorunur. Daxilində isə 650 mAh tutumlu batareya yerləşdirilib.
Yenilik qara və bej rənglərdə təqdim olunur. Xiaomi Bluetooth Speaker Magnetic Edition-ın pərakəndə satış qiyməti 27 dollar olacaq.
