OpenAI təcrübəsiz istifadəçilər üçün ChatGPT-də şəkil yaratma prosesini sadələşdirib. Yeni əlavə olunmuş vizual üslub funksiyası sayəsində indi istifadəçilər əvvəlcədən təyin olunmuş üslublardan birini — məsələn, anime, retro cizgi filmi və ya fotosessiya tərzini — seçərək lazım olan formatda şəkillər əldə edə bilərlər. Bunun üçün mürəkkəb mətnli sorğular yazmağa ehtiyac qalmır.
Əvvəllər yüksək keyfiyyətli şəkil yaratmaq üçün istifadəçi trend və üslub xüsusiyyətlərinə uyğun ətraflı təsvir yazmalı olurdu. Yeni alət isə bu asılılığı minimuma endirir: sadəcə hazır üslublardan birini seçmək və ya istədiyiniz səhnəni qısaca təsvir etmək kifayətdir — qalan işi isə ChatGPT görür və görüntünü seçilmiş temaya uyğunlaşdırır.
Bu funksiya bütün istifadəçilər üçün pulsuz olacaq, lakin mərhələli şəkildə istifadəyə veriləcək. Tərtibatçıların fikrincə, bu yenilik şəkil generasiyasını geniş auditoriya üçün əlçatan edir — xüsusilə də prompt (sorğu) yazmaq sahəsində təcrübəsi olmayanlar üçün. Yeni sistem həmçinin müxtəlif üslublarla daha tez eksperiment aparmağa və daha stabil, proqnozlaşdırıla bilən nəticələr əldə etməyə imkan verir.
