Apple-in son təqdimatı təkcə istifadəçilərin deyil, digər texnologiya nəhənglərinin də diqqətini cəlb edib. Xüsusilə Samsung fürsəti əldən verməyərək Apple-in “yeni” funksiyalarını və süni intellekt yeniliklərini istehza ilə qarşıladı.
Samsung rəsmi X (keçmiş Twitter) hesabında belə yazıb:
“Fərdiləşdirilə bilən tətbiqlər? Üzən menyular? Bu şüşə kimi parlaq interfeys? Nədənsə tanış görünür…”
iOS 26 və macOS 26-da təqdim olunan Liquid Glass dizaynı bir çox baxımdan Windows Vista-nın Aero interfeysini xatırladır. Yeni tətbiq ikonlarının üslubu isə bəzi test istifadəçilərinin fikrincə, ikonların görmə qabiliyyətini azaldır və mətnin oxunmasını çətinləşdirir.
Eyni zamanda Samsung, Galaxy AI funksiyalarını xatırladaraq, Apple-ın bəzi İİ yeniliklərini yalnız indi beta mərhələsinə çatdırdığını vurğulayıb:
“Canlı tərcümə funksiyasına yenisiniz? Xoş gəlmisiniz! Biz artıq mətn və səsi real vaxtda tərcümə edirik. Süni intellekt Apple saatlarına gəlir? Gözəl. Bizim saatlar artıq sizin nə vaxt yorulduğunuzu anlayır.”
WWDC təqdimatında Apple süni intellektdən çox məlumatların məxfiliyinə diqqət yetirib. Bəzi ixtisaslaşmış texnoloji media qurumlarının fikrincə, Cupertinodan olan texnoloji nəhəngin Android rəqiblərini yaxalaması üçün hələ uzun yol getməsi lazım olacaq.
