Microsoft Windows əməliyyat sistemində təhlükəsizliklə bağlı böyük dəyişikliklər hazırlayır. Şirkət antivirus (AV) və təhdidlərin aşkarlanması (EDR) üçün istifadə olunan proqram təminatlarını əməliyyat sisteminin nüvəsindən (kernel) çıxarmağı planlaşdırır. Bu qərarın əsas məqsədi — CrowdStrike tərəfindən ötən il baş vermiş və 8,5 milyon cihazın sıradan çıxmasına səbəb olan nasazlıq kimi halların qarşısını almaqdır.
Yeni təhlükəsizlik platforması Microsoft-un CrowdStrike, Bitdefender, ESET və Trend Micro kimi təhlükəsizlik proqram təminatı istehsalçıları ilə birgə hazırlanır. Yeniliklər nüvə səviyyəsindəki drayverlərdəki səhvlərin yaratdığı riskləri, o cümlədən sistemin çökməsi və “mavi ekran” (BSOD) problemlərini minimuma endirməyə yönəlib.
Hazırda bu dəyişikliklərin xüsusi ilkin versiyası Microsoft-un tərəfdaşlarına təqdim olunub. İlk mərhələdə AV və EDR proqramları nüvədən çıxarılacaq, lakin nüvə səviyyəli drayverlər oyunlardakı anticheat sistemləri kimi digər funksiyalar üçün hələlik istifadə olunmağa davam edəcək. Microsoft oyun tərtibatçıları ilə birlikdə bu asılılığın da azaldılması üzərində işləyir.
Bundan başqa, 2025-ci ilin yayında çıxarılacaq Windows yeniləməsində Quick Machine Recovery funksiyası da əlavə olunacaq. Bu funksiya sistemin sıradan çıxdığı hallarda Windows Recovery Environment (WinRE) vasitəsilə cihazları sürətli şəkildə bərpa etməyə imkan verəcək. Eyni zamanda, Microsoft BSOD dizaynını da dəyişir — klassik mavi rəng yerini qara ekrana verəcək.
