İlon Mask bildirib ki, Tesla-nın Avropada satışlarının zəifləməsi əsasən bu bölgədə avtomobil bazarının “yetərincə zəif” olması ilə bağlıdır. O qeyd edib ki, bu problem yalnız Tesla-ya deyil, digər istehsalçılara da təsir edir. Lakin son statistika əksini göstərir: Avropada elektromobil bazarı sürətlə inkişaf edir, amma Tesla bu artımdan geridə qalır və satışları daha sürətlə azalır.
Aprel ayında elektromobil satışları ötən illə müqayisədə 28% artıb, halbuki Tesla-nın satışları 49% azalıb. Bu tendensiya mayda da davam edib: məsələn, Böyük Britaniyada elektromobil satışları 28% artdığı halda, Tesla-nın göstəriciləri 45% azalıb.
Xüsusilə Almaniyada vəziyyət diqqət çəkicidir — burada may ayında cəmi 1 210 Tesla avtomobili satılıb ki, bu da ötən illə müqayisədə 36% azalma deməkdir. Eyni zamanda Almaniyada elektromobil bazarı 45% böyüyüb. Tesla-nın bu bazardakı payı isə cəmi 0,5% təşkil edir.
Bəzi müşahidəçilər bu azalmanı təkcə iqtisadi faktorlarla deyil, İlon Maskın son seçkilərdə ifrat sağçı AfD partiyasına verdiyi açıq dəstəklə də əlaqələndirirlər.
