Microsoft, Apple-a qarşı məhkəmədə Epic Games-i dəstəkləyərək bəyan edib ki, uzun müddətdir iOS üçün Xbox oyun mağazasını istifadəyə verməyi arzulayır. Lakin Apple-ın yüksək komissiya haqları bu planların reallaşmasına imkan verməyib.
Şirkət əvvəllər də Xbox Cloud mobil tətbiqinin iOS versiyasının olmamasını Apple-ın sərt maliyyə şərtləri ilə izah edirdi. İndi isə, Epic Games-in məhkəmə qalibiyyəti və Fortnite-ın App Store-a qayıdışı Microsoft üçün yeni fürsət yaradıb.
Əgər Apple apellyasiya məhkəməsində uduzarsa, Xbox konsol oyunlarını iPhone-da birbaşa Xbox Cloud vasitəsilə almaq və oynamaq mümkün olacaq — həm də Apple komissiyası olmadan, yəni mikrosatışlar birbaşa Microsoft-un öz sistemindən keçəcək.
Qeyd edək ki, ötən il Kaliforniya məhkəməsi Google-u da mobil bazarda inhisarçı elan etdikdə, Microsoft oxşar tətbiqi Android üçün də hazırlamışdı. Lakin Google-un apellyasiyası bu günə kimi baxıldığından həmin layihə hələ də reallaşmayıb.
