WhatsApp bəzi köhnə smartfon istifadəçiləri üçün hesab giriş qaydalarını sərtləşdirməyə başlayıb. Android və iOS-un köhnəlmiş versiyalarından istifadə edən cihazlarda WhatsApp hesabına daxil olmaq mümkün olmayacaq. Məhdudiyyət hazırda messencerin beta versiyasını sınaqdan keçirən bəzi istifadəçilər üçün aktivləşdirilib.
WhatsApp cihazda əməliyyat sisteminin köhnə versiyasını müəyyən etdikdə ekranda xüsusi xəbərdarlıq göstərir. İstifadəçidən mobil əməliyyat sistemini yeniləməsi və daha sonra hesaba yenidən daxil olmağa çalışması tələb olunur. Bu xəbərdarlığı keçmək mümkün deyil. Tərtibatçılar bildirirlər ki, məhdudiyyətin əsas məqsədi istifadəçi məlumatlarının təhlükəsizliyini qorumaqdır. Köhnəlmiş əməliyyat sistemləri yeni təhlükəsizlik mexanizmlərini dəstəkləmədiyi üçün WhatsApp bu cür cihazlarda hesab girişini məhdudlaşdırmağa başlayıb.
Maraqlısı odur ki, yoxlama WhatsApp tətbiqinin konkret versiyasına bağlı deyil. Funksiya uzaqdan aktivləşdirilə bilir, buna görə istifadəçi hətta WhatsApp-ı yeniləməsə belə, hesab girişinə dair xəbərdarlıqla qarşılaşa bilər. Məhdudiyyət həm Android, həm də iOS cihazlarına tətbiq oluna bilər.
Hazırda WhatsApp dəqiq hansı əməliyyat sistemi versiyalarının bu məhdudiyyətə düşəcəyini açıqlamayıb. Həmçinin yeni qaydanın messencerin stabil versiyasındakı bütün istifadəçilərə nə vaxt tətbiq olunacağı da məlum deyil.
