Hyundai Cənubi Koreya bazarında yenilənmiş 2027 model ilinə aid Palisade krossoverini təqdim edib. Flaqman model daha zəngin standart təchizat, bir neçə yeni versiya və xüsusilə diqqətçəkən High Roof modifikasiyasını əldə edib. Bu versiyada avtomobilin tavanı 240 mm hündürləşdirilib.
Əlavə konstruksiya sayəsində salonda sərnişinlərin baş hissəsi üçün daha çox boşluq yaradılıb. Palisade High Roof-un ümumi hündürlüyü 2005 mm-dir. Hyundai bildirir ki, avtomobilin hündürlüyü standart yeraltı dayanacaqlardan istifadə imkanını qoruyacaq şəkildə hazırlanıb.
Xaricdən High Roof versiyasını kuzov rəngində hündür tavan, alüminium görünüşlü elementlər, qara pəncərə çərçivələri və 21 düymlük təkər diskləri ilə fərqləndirmək mümkündür.
High Roof-un salonu adi ailə krossoverindən çox premium sərnişin şatlını xatırladır. Tavana havalandırma çıxışları, açılıb-bağlanan oxu lampaları, ayrıca iqlim idarəetməsi və 21,4 düymlük ekran inteqrasiya edilib. Bundan başqa, Starry Sky dekorativ işıqlandırması tavanda ulduzlu səma effektini yaradır.
Əlavə VIP Package 2 paketi ikinci sıra sərnişinləri üçün iki naqillsiz şarj doldurma qurğusu və hava təmizləyicisi ilə təchiz edilmiş mərkəzi konsol əlavə edir. Stəkanaltılar isə içkilərin müəyyən edilmiş temperaturda saxlanmasını dəstəkləyə bilir.
Palisade High Roof üç sıra oturacaqla və yeddi və ya doqquz nəfərlik salon variantında təklif olunur.
Yenilənmiş Palisade daha bir maraqlı texnologiya — Preview ECS sistemi ilə təchiz edilib. Elektron idarə olunan asqı ön kameradan və naviqasiya məlumatlarından istifadə edərək yolun vəziyyətini əvvəlcədən qiymətləndirir və nahamarlıqlara çatmazdan əvvəl amortizatorların iş rejimini avtomatik dəyişir.
Koreya bazarında Black Ink və XRT versiyaları da təqdim olunub. Black Ink premium Calligraphy versiyası əsasında hazırlanıb və qaraldılmış dekor elementləri, emblemlər və 21 düymlük disklərlə seçilir. İkinci sıra sərnişinləri üçün isə masaj funksiyalı oturacaqlar nəzərdə tutulub.
Palisade XRT daha çox yolsuzluq üslubuna yönəlib. Avtomobil qoruyucu kuzov dəsti, tavan reylinqləri və 20 düymlük disklər əldə edib. Təchizata həmçinin 14 dinamikli Bose audio sistemi və ikinci sıra oturacaqlarının ventilyasiyası daxildir.
Əsas Palisade Exclusive versiyası da yenilənib. Artıq standart təchizata böyük əyri panoramik ekran və daha geniş elektron sürücü köməkçiləri paketi daxil edilib.
Mühərrik xəttində isə dəyişiklik yoxdur. 2,5 litrlik turbomühərrik 277 at gücü hasil edir və 8 pilləli avtomatik transmissiya ilə işləyir. Hibrid qurğu isə 329 at gücünə malikdir və 6 pilləli avtomatik transmissiya ilə təklif olunur. Hər iki versiyanı ön və ya tam ötürücü ilə seçmək mümkündür.
Cənubi Koreyada yenilənmiş Hyundai Palisade 2027-nin qiyməti 44,78 milyon vondan (təxminən 32,3 min dollar) başlayır. Seriyanın ən bahalı modeli isə 81,59 milyon von (təxminən 58,9 min dollar) qiymətində təklif olunan yeddi yerlik hibrid Palisade High Roof versiyasıdır.
