Apple süni intellektlə yaradılan saxta şəkillərin qarşısını almaq üçün Apple Reference Image adlı yeni texnologiya hazırlayır. Sistem fotoşəklin həqiqətən iPhone kamerası ilə çəkildiyini, yoxsa süni intellekt vasitəsilə yaradıldığını müəyyən etməyə kömək edəcək.
Yeni funksiya iOS 27 Beta 5 versiyasının fayllarında aşkarlanıb. Məlumata görə, standart «Kamera» tətbiqinə Reference adlı xüsusi çəkiliş rejimi əlavə olunacaq. Bu rejim aktivləşdirildikdə iPhone çəkilən fotonun metadatasına onun mənşəyini təsdiqləyən şifrələnmiş məlumatlar əlavə edəcək.
Şəklin həqiqiliyini daha sonra iPhone, iPad və ya Mac-da xüsusi işarəyə toxunaraq yoxlamaq mümkün olacaq. Sistem sensorun unikal xüsusiyyətləri, çəkilişin dəqiq vaxtı və cihazın aparat identifikatorları kimi məlumatları Private Cloud Compute serverlərinə göndərərək yoxlama aparacaq.
Vacib məqam odur ki, şəklin özü serverə yüklənməyəcək. Beləliklə, Apple yoxlama prosesində fotoşəklin məzmununu deyil, onun texniki məlumatlarını istifadə edəcək.
Yoxlama uğurlu olarsa, şəkilə xüsusi identifikasiya nömrəsi veriləcək və onun təsdiqlənmiş foto olduğu göstəriləcək.
Apple mümkün saxtalaşdırma hallarına qarşı da tədbir görüb. Əgər cihazın kamera sensoruna müdaxilə edilərək foto məlumatlarının saxtalaşdırıldığı müəyyənləşərsə, şirkət həmin cihaz üçün gələcək yoxlamaları bloklaya və əvvəllər verilmiş bütün autentiklik sertifikatlarını ləğv edə biləcək.
Yeni sistemin xüsusilə peşəkar fotoqraflar və jurnalistlər üçün faydalı olması gözlənilir. Süni intellektlə hazırlanmış görüntülərin sürətlə yayılması fonunda çəkilən materialın həqiqiliyini sübut etmək getdikcə daha vacib olur.
Apple bu istiqamətdə ilk addımı atan şirkət deyil. Leica, Sony və Nikon fotoşəkillərin mənşəyini təsdiqləmək üçün C2PA Content Credentials standartından istifadə edir. Google da bu texnologiyanı Pixel 10 seriyasına inteqrasiya edib.
