Meta süni intellekt köməkçisi Muse-un imkanlarını genişləndirərək onu Apple Watch və Android-in Wear OS əməliyyat sistemi ilə işləyən ağıllı saatlara gətirib. Yeniləmə sayəsində istifadəçilər artıq birbaşa biləklərindəki saat vasitəsilə səsli zəng, mətn mesajı və ya səsli diktə ilə AI köməkçisi ilə ünsiyyət qura biləcəklər.
Bu addım Meta-nın Muse üçün iPad tətbiqini təqdim etməsindən cəmi bir ay sonra atılıb. Süni intellekt köməkçisi ilk dəfə sentyabr ayında App Store-da istifadəyə verilib. Onun Apple cihazları arasında genişlənməsi Meta-nın Muse-u öz ekosisteminin əsas hissələrindən birinə çevirmək istədiyini göstərir.
Works around the clock, and now on your wrist. Muse is now on Apple Watch and Wear OS ⌚️ https://t.co/97QRap5XKz
— Muse (@Muse) November 9, 2026
Muse hazırda istifadəçilərin diqqətini cəlb etmək uğrunda rəqabət aparan onlarla süni intellekt agentindən biridir. Platforma e-poçt, görüşlər, hesablar və digər xidmətləri idarə etmək üçün müxtəlif hesabları birləşdirməyə imkan verir. Bundan əlavə, rezervasiya etmək, ərzaq sifariş etmək, məqsədlər müəyyənləşdirmək və alış-veriş kimi tapşırıqları da yerinə yetirə bilir. İstifadəçilər Muse-un virtual avatarını da öz zövqlərinə uyğunlaşdıra bilərlər. Onun görünüşünü insana, heyvana və ya başqa tipli personaja bənzətmək mümkündür.
Nisbətən yeni məhsul olmasına baxmayaraq, Meta Muse-a yeni imkanlar əlavə etməkdə kifayət qədər sürətli davranır. Cəmi bir neçə gün əvvəl şirkət Muse ilə ünsiyyət və birgə iş üçün nəzərdə tutulan Spaces funksiyasını təqdim edib. Bu funksiya konkret mövzular ətrafında ayrıca söhbət yaratmağa imkan verir. Meta onları istifadəçilərin məqsədlərinə uyğun olaraq süni intellekt tərəfindən dinamik şəkildə qurulan mini tətbiqlər kimi təsvir edir. Spaces bölməsi Muse interfeysinin yan panelində yerləşir. Buradan istifadəçilər müəyyən tapşırıq və ya məqsəd üçün ayrıca söhbət başladaraq AI agentinə həmin istiqamətdə işləməyi həvalə edə bilərlər.
Bundan başqa, ötən həftə ABŞ-dakı istifadəçilər üçün Muse-un AI avatarı ilə videozəng imkanı da istifadəyə verilib. Meta-nın sözlərinə görə, avatar danışıq zamanı söhbətin məzmununa və tonuna uyğun incə mimika və jestlərdən istifadə edir. Bununla belə, Muse istifadəçini əslində görə bilmir: o, istifadəçinin səsini eşidir və real vaxt rejimində cavab verir.
Muse istifadəyə verildikdən qısa müddət sonra daha bir mühüm göstəriciyə nail olub. Tətbiq App Store-da ilk 40 gün ərzində ABŞ-da 10 milyon yüklənmə həddini keçən cəmi 12 mobil tətbiqdən biri olub. Həmin tədbiqlərdən sonuncusu 2023-cü ilin iyulunda bu həddə çatan Meta-nın Threads platforması idi.
