Bluetooth texnologiyasında ciddi sürət artımı gözlənilir. Bluetooth Special Interest Group (SIG) təşkilatı Bluetooth LE cihazlarında məlumat ötürmə sürətini əhəmiyyətli dərəcədə artıracaq Bluetooth High Data Throughput (HDT) spesifikasiyasını təsdiqləyib. Yeni texnologiya Bluetooth Core 7.0 standartının bir hissəsi olacaq və onu dəstəkləyən ilk cihazların artıq 2027-ci ildə təqdim edilməsi gözlənilir.
Təşkilatın yaydığı məlumata görə, yeni texnologiya sayəsində məlumat ötürmə sürəti hazırkı 2 Mbit/s-dən 7,5 Mbit/s-ə yüksələcək. Bu isə eyni vaxt ərzində daha çox məlumat ötürməyə imkan verəcək. Nəticədə Bluetooth üzərindən daha yüksək keyfiyyətli naqilsiz səs ötürülməsi, eləcə də məkan və çoxkanallı audio imkanları genişlənəcək.
Yenilik yalnız səs keyfiyyətinə deyil, bağlantının sürətinə və etibarlılığına da müsbət təsir göstərəcək. Artan məlumat ötürmə qabiliyyəti məkan hesablamaları üçün nəzərdə tutulan cihazlarda və intensiv məlumat mübadiləsi tələb edən süni intellekt əsaslı tətbiqlərdə xüsusilə faydalı olacaq. Bundan əlavə, proqram təminatının yenilənməsi və fiziki aktivlik məlumatlarının cihazlar arasında sinxronlaşdırılması kimi gündəlik əməliyyatlar da daha sürətli həyata keçiriləcək.
Yeni texnologiyanı dəstəkləyən ilk cihazlar 2027-ci ilin yanvarında keçiriləcək CES sərgisində nümayiş oluna bilər. Lakin hələlik bu barədə rəsmi təsdiq yoxdur.
