Microsoft Surface Laptop Ultra adlı yeni flaqman noutbukunu təqdim edib. Şirkət onu Surface seriyasının tarixindəki ən güclü model kimi mövqeləndirir. Cihazın əsas üstünlüyü NVIDIA-nın RTX Spark Superchip platformasıdır. Bu avadanlıq xüsusilə lokal süni intellekt modelləri və digər ağır hesablama tapşırıqları üçün nəzərdə tutulub.
Noutbuk 15 düymlük PixelSense Ultra sensor ekranla təchiz olunub. Mini-LED işıqlandırmaya malik panel 3:2 görüntü nisbəti və 120 Hz yenilənmə tezliyi təklif edir. HDR rejimində maksimal parlaqlıq 2000 nitə çatır, rəng əhatəsi isə P3 məkanının 100%-ni təşkil edir. Cihaz həmçinin şüa izləmə, NVIDIA DLSS və NVIDIA Reflex texnologiyalarını dəstəkləyir.
Ən güclü versiyada Surface Laptop Ultra 20 nüvəli NVIDIA Grace çipi və 6144 CUDA nüvəsinə malik Blackwell RTXqrafik sürətləndiricisi ilə təchiz edilir. Vahid LPDDR5X yaddaşının həcmi 128 GB-a qədər artırılır. Microsoft-un iddiasına görə, belə konfiqurasiya noutbukda 120 milyard parametrə qədər olan süni intellekt modellərini lokal şəkildə işə salmağa imkan verir.
Bu qədər güclü avadanlığın yaratdığı istiliyi idarə etmək üçün xüsusi soyutma sistemi hazırlanıb. İstehsalçının məlumatına görə, yeni sistem Surface Laptop 15-dəki həll ilə müqayisədə 2,5 dəfə daha effektivdir. Buna baxmayaraq, noutbukun korpusunun qalınlığı 18 mm-dən az, çəkisi isə təxminən 2 kq təşkil edir.
Microsoft bağlantı imkanlarına da xüsusi diqqət yetirib. Cihazda üç USB-C portu var və onlardan biri Magnetic Connect maqnitli şarj sistemi üçün istifadə olunur. Bundan əlavə, USB-A, HDMI, SD kart oxuyucusu və 3,5 mm qulaqlıq girişi təqdim edilir. Noutbuk eyni anda üç 4K monitora qoşula bilir.
Digər xüsusiyyətlər arasında Full HD kamera, iki mikrofon, Dolby Atmos dəstəkli iki dinamik, Wi-Fi 7, Bluetooth 5.4 və toxunma geribildirimi verən böyük trekpad yer alır. Batareyanın bir şarjla 15 saata qədər video izləməyə, yaxud 12 saata qədər internetdə işləməyə imkan verdiyi bildirilir.
Microsoft yeni Surface Laptop Ultra-nı əsasən proqramçılar, qrafika ilə işləyən mütəxəssislər və güclü süni intellekt modellərini bulud xidmətlərinə ehtiyac olmadan lokal şəkildə çalışdırmaq istəyən istifadəçilər üçün nəzərdə tutur.
ABŞ-da Surface Laptop Ultra-nın qiyməti yaddaş konfiqurasiyasından asılı olaraq 2 599 — 5 899 dollar arasında dəyişəcək. Noutbukun satışına 16 oktyabr 2026-cı ildə başlanması planlaşdırılır.
